Gealon Racing Team miangkon og laing kalamposan
CEBU, Philippines — Nagparamdam ang pipila ka mga sakop sa Gealon Racing Team-Break 100 sa ilang presensiya atol sa nagmalampuson nga SM2SM Run 2025 nga nakahakot og rekord ng 14, 612 ka runners niadtong weekend.
Bisan og dunay gihambin nga injury sa iyang tiil, si Judge Hazel Caraballe madasigong midagan ug tuod man namunga ang iyang determinasyon human siya mitapos sa ikaunom nga dapit sa women's 12K category sud sa usa ka oras ug tulo ka minuto.
Ang ultramarathoner niyang teammate nga si Andy Toniacao nalandig sa ikawalong puwesto sa men's 21K division nga gihuman niini sud lamang sa usa ka oras ug 18 minutos.
Nakatikang sab sa finish line ang ubang mga sakop sa team nga sila si Fiscal Jill Ann Gealon, Limito Caraballe Jr., Santiago Oralde, Jhonelle Tibay, Mikko Laguda, Alkin Ando, Richard Celestial, Michael Vasaya, Cesar ug Chester Rago ingon man si coach Alex Cabando.
Didto sa Bohol, ang pambatong runner sa GRT nga si Kelvin Boyles maoy milugwa nga kampiyon sa 32K sa Tagbilaran City Police Station (TCPS) Run.
Si Boyles midagan sab sa 6K nga distansiya sa susamang kalihukan isip kabahin sa iyang recovery run.
Didto sa Sagay City, Negros Occidental, ang triathlete nga si Rudy Niño Singular miangkon sa dungog isip first runner-up sa 1st Sinigayan 51.50 Triathlon.
Ang manedyir sa GRT nga si Cebu City Councilor Atty. Rey Gealon midayeg sa iyang mga batos tungod sa gipakita nilang katakos. Labaw sa tanan, nagpasalamat siya sa kahitas-an sa pagbulig sa tanang mga atleta og maanindot ug luwas nga lumba.
- Latest
