Unom ka ex-PBA players mangu sa Cebu Classic

CEBU, Philippines — Unom ka kanhi PBA players ug unom sab ka lokal nga mga talento ang maglangkob sa Cebu Classic nga mokumbati og balik sa 7th Maharlika Pilipinas Basketball League (MPBL) season, nga misikad na niadtong Marso 8 didto sa The Capital Arena sa Ilagan, Isabela.

Ang mga ex-pro nga sila si Rashawn McCarthy, Jan Jamon, Ken Holmqvist, Paolo Hubalde, Gryann Mendoza ug Lean Martel maoy mamahimong haligi sa Cebu sa giatngan niining pagbalik gikan sa lima ka tuig nga pahuway sa rehiyonal nga liga nga gitukod ni boxing legend Manny Pacquiao niadtong 2017.

Maghiusa sila og puwersa uban sa mga garbo sa Sugbo nga sila si Shaquille Imperial, Brylle Meca, Limuel Tampus, Jiesel Tarosa, Jeco Bancale ug Dolan Adlawan.

Nagkumpleto sa 22-man lineup sa Cebu sila si Dennis Santos, Kascius Small-Martin, John Jabonete, Ladis Lepalam, Darrell Manliguez, Mark Meneses, Mike de los Santos, Jameson Hiro, Vergian Santos ug John Paul Martinez.

Ubos sila sa paggiya ni head coach Voltaire Ora inabagan nilang Mike Reyes, Jun da Jose, Marlon Zambrano, Demy Salenga ug Jean Putong. Ang Cebu magsugod sa ilang kampanya batok sa Caloocan Batang Kankaloo karong Huybes, Marso 13, didto sa Cuneta Astrodome sa Pasay City.