Shai miwani ni Jokic, OKC milampornas sa Nuggets

CEBU, Philippines — Si Shai Gilgeous-Alexander miwani sa iyang karibal pagka-MVP nga si Nikola Jokic uban ang eksplosibong 40 puntos nga performance sa dihang gipahagba sa Oklahoma City Thunder ang Denver Nuggets, 127-103, sa NBA kagahapong adlawa didto sa Paycom Center sa OKC.

Nakasikit pa unta ang Nuggets ngadto na lang sa usa ka lugas human mabiyai og 11 puntos sa ikatulong kuwarter apan ang Thunder nagmangtas sa pinal nga 12 minutos sa aksiyon diin ilang gikulata ang bisita nilang Denver, 41-20, dayon na ngadto sa pagposte og 24 puntos nga demolisyon.

Ang bangis nga Canadian point guard mitali og nuybe puntos sa katapusang kuwarter aron kumpletohon ang ika-11 niyang 40 puntos nga duwa ning season.

Jalen Williams mihipos og 26 puntos samtang si Chet Holmgren mitimbre og 14 puntos alang sa Thunder, nga padayong nag-una sa Western Conference uban ang 53-11 rekord human mirehistro sa ikapito nilang sagunson nga daog.

Si Jokic mipupo og 24 puntos, 13 ka rebounds ug siyam ka assists samtang si Michael Porter Jr. mikimada sab og 24 puntos apan nakawang ang ilang paningkamot kay ang Nuggets natagak sa 41-23.

Sa laing bahin, ang lider sa Eastern Conference nga Cleveland Cavaliers miinat sa nagkadena nilang daog ngadto sa 14 ka duwa human gipayaka ang Milwaukee Bucks, 112-100.

Didto sa Dallas, sila si Devin Booker ug Kevin Durant nagkumboya'g 45 puntos sa dihang gibuntog sa Phoenix Suns ang Dallas Mavericks, 125-116, aron pahayagan ang ilang tsansa nga makaabot sa play-in tournament.

Wala sab magpabitin ang Minnesota Timberwolves nga mipataas sa ilang baraha ngadto sa 37-29 human gilampaso ang San Antonio Spurs, 141-124. Sa ilang pagbarog sa ikapitong puwesto sa West, dako silang hulga sa Golden State Warriors nga makaangkon og awtomatik nga luna sa playoffs. Sa New Orleans, sila si Ja Morant ug Desmond Bane nagkumbinar og 62 puntos aron pangulohan ang Memphis Grizzlies ngadto sa 107-104 nga pagpiog sa Pelicans.