Tulo ka boksidor sa ARQ gikoronahang kampiyon
CEBU, Philippines — Si Rodel “The Hulk” Wenceslao usa na karon ka double champion samtang ang iyang mga katropa sa ARQ Stable nga sila si Speedy Boy Acope ug Angelus "Pitbull" Pilapil milampos sa una nilang title fights atol sa "Engkwentro 15: Binombahay sa Cawayan II" sa ARQ Boxing Promotions niadtong Sabado sa gabii, Marso 8, didto sa Cawayan Municipal Plaza sa Masbate.
Ang 31-anyos nga si Wenceslao (23-19-2, 12KOs) mi-iskor og 5th round TKO nga kadaogan batok ni Atchariya Wirojanasunobol (15-6, 7KOs) sa Thailand aron idugang ang World Boxing Foundation International welterweight title sa iyang WBF Australasian belt.
Giundang sa reperi ang sangka sa oras nga 1:30 sa ikalimang hugna sa dihang si Wirojanasunobol kalit lang miluhod ug dili na makatiwas pa og away. Ang bisitang Thai nagtakiang pagawas sa ring kay dunay gihambin nga angol sa iyang tiil.
Sa laing bahin, si Acope (5-1, 3KOs) mipukan ni Peter Estiller (6-3-1, 4KOs) pinaagi sa TKO sa ikaunom nga hugna aron angkonon ang trono sa PBF Youth lightweight division, samtang si Pilapil (5-0, 3KOs) mipatikangkang ni John Rey Labajo (4-3-1, 4KOs) sa ikaupat nga hugna aron langkaton ang PBF Youth flyweight belt.
Sa ubang resulta, si World Boxing Association (WBA) Asia South flyweight champion Berland "The Triggerman" Robles miinat sa way pilde niyang rekord ngadto sa 12-0 nga gidayan-dayan na karon og 5KOs human iyang gipayaka si Anferne Palarca (5-7-1, 1KO) sa ikatulong hugna.
Si kanhi Oriental and Pacific Boxing Federation (OPBF) Silver flyweight champion April Jay "Astroboy" Abne (15-1-1, 6KOs) igo lamang nakatabla ni Anthony Gilbuela (8-7-3, 2KOs) sa Big Yellow Gym samtang si Dave Bacang mihimo og impresyon sa iyang pro debut human gidominar si Rebin Crish Paclawon sud lamang sa duha ka hugna.
- Latest
