PH spikers mapapalaban sa FIVB World Tour
MANILA, Philippines — Makikipagbakbakan ang Pinoy spikers sa matitikas na koponan sa mundo sa 2024 FIVB Volleyball World Beach Pro Tour Futures na papalo ngayong araw sa Nuvali Sand Courts sa Santa Rosa, Laguna.
Nangunguna sa listahan ang apat na pares mula sa Pilipinas — sina Ran Abdilla at AJ Pareja, at sina Rancel Varga at James Buytrago sa men’s division.
Aariba naman sa women’s division sina Kly Orillaneda at Gen Eslapor, at sina Alexa Polidario at Jenny Gaviola.
Ito ang ikalawang sunod na torneong inorganisa ng Philippine National Volleyball Federation kung saan nauna na ang Asian Volleyball Confederation Beach Tour Nuvali Open noong nakaraang linggo.
“It’s another four days of elite volleyball action,” ani PNVF president Ramon ‘Tats’ Suzara.
Papalo rin sa men’s division ang Germany, Czech Republic, Hungary, Japan, Malaysia, Sweden, Thailand, Turkiye, Latvia at New Zealand.
Sasabak naman sa women’s class ang USA, Canada, Israel, Japan, South Korea, Lithuania, New Zealand, Sweden, Germany, Latvia, Malaysia at Thailand.
Maliban sa World Tour Futures, idaraos din sa Pilipinas ang Volleyball Nations League Men’s Week 3 sa Mall of Asia Arena sa Hunyo 18 hanggang 23 gayundin ang 5th AVC Challenge Cup for Women (May 25-June 1 sa PhilSports Arena), 4th Southeast Asia V League Women’s Week 2 (July) at Volleyball World Beach Pro Tour Challenge (November 28-December 1 sa Nuvali).
- Latest
