Team Niños nagpanikad na sa ABAP National Championship

CEBU, Philippines - Ang walo ka mga boksidor sa Team Cebu City Niños ang anaa na karon sa katapusang hugna sa ilang ensayo alang sa umaabot nga PLDT-Amateur Boxing Association of the Philippines (ABAP) National Championship karong Enero 21 didto sa Cagayan de Oro City.

 Ang Cebu City Niños nga gilangkuban sa mga boksidor gikan sa Cebu City Sports Center (CCSC) stable ug Omega Boxing Gym gibitoonan nilang Charlie Pocdol (64 kgs), Romel Acruz ug Raymund Empic sa 54 kgs, Steven Limfranca ug Jari Payao sa 52 kgs, Jap Gibora (50 kgs), Jordan Catubay (49 kgs) ug Wilmark Dignos (46 kgs).

Gawas sa mga boksidor sa runner-up nga Team Niños, ang Team Mandaue City nga maoy kampiyon sa ABA regional tournament, mopadala usab sa ilang mga boksidor.

Si CCSC stable trainer Jordan Dopalco mibutyag nga human sa Sinulog festival, molarga dayon sila ngadto sa Cagayan de Oro sa Enero 19. 

Ang Team Niños gisuportahan sa Cebu City Sports Commission ug sa kagamhanan sa siyudad sa Sugbu. – BANAT NEWS