‘Luka Magic’ iginiya Lakers sa ika-8 sunod

PHOENIX — Bumanat si Luka Doncic ng 43 points at dumiretso ang Los Angeles Lakers sa kanilang pang-walong sunod na panalo sa 131-123 pagpapalamig sa Suns.
Kumonekta rin si Doncic, ang NBA leading scorer, ng limang three-point shots at tumipa ng 12-for-14 clip sa free throw line.
Nagdagdag si Quentin Grimes ng 22 points tampok ang limang triples para sa Los Angeles (12-2) na naglaro na wala si second-leading scorer Austin Reaves (bruised heel).
Umiskor si Devin Booker ng 17 points sa panig ng Phoenix (5-7).
Sa likod ni Doncic, itinala ng Lakers ang isang 31-point lead sa third quarter bago nakabangon ang Suns sa fourth period sa pamumuno ni Collin Gillespie.
Iniskor ni Gillespie ang 12 sa kanyang 26 points sa final quarter para ilapit ang Phoenix sa 121-126 agwat sa huling 1:05 minuto.
Nagsalpak si Grimes ng isang tres sa nalalabing 34 segundo kasunod ang dalawang free throws ni Doncic para selyuhan ang panalo ng Los Angeles.
Sa iba pang laro, panalo ang Philadelphia 76ers sa Indiana Pacers, 131-124; nilunod ng Los Angeles Clippers ang Charlotte Hornets, 113-105; wagi ang San Antonio Spurs sa Utah Jazz, 110-102; tinalo ng Boston Celtics ang Dallas Mavericks, 131-94; at lusot ang New York Knicks sa Toronto Raptors sa overtime, 112-108.
- Latest
















