Makahimo ba ang mga layko sa pagpandong sa ilang mga kamot ngadto sa uban

Ang pagpandong sa mga kamot ngadto sa uban ang mahimo natong sabton ingon nga epeclectic kun ang pagsangpit sa Espiritu Santo ug sa laing bahin parianon. Gihimo kini diha sa mga sakramento sa bunyag, pirma, hilog sa masakiton ingon man sa ordinasyon. Pagahimoon usab kini panahon nga dunay panalanginan nga mga sacramentales ingon man diha sa eksorsismo.

Diha sa mga panagtigom sa mga pundok sa Charismatic Renewal Programs ang mga laykong nagdumala ang nihimo sa ingon bisan pa man anaa ang mga kaparian. Nahimo kining komon nga talan-awon. Bisan pa man kun walay dayag nga pagdili gikan sa Simbahan kalabot niini, apan ang balansayon sa pagpandong sa mga kamot ngadto sa kaparian, ug kaobispohan ug sa uban ang dili haom kon maghisgot kita og teolohiya, doktrina ug liturhiya. Naghatag lamang kini og kalibog. Atong hinumdoman nga ang makahimo sa pagpandong sa kamot ngadto sa uban mao raman sila nga dunay espirituhanong gahom ngadto sa gipandongan.

Ang Sagradong Orden sa mga dyakono, pari ug obispo mao ang nakahatag og gahom kanila nga naordinahan. Bisan pa man kun ang layko usa lider kun pangulo sa usa ka pundok ang dili makahimo sa ingon sanglit ang gahom sa matag layko dunay limitasyon diha lamang sulod sa ilang pamilya ingon man sa ilang kabtangan. Mao nga ang mga ginikanan sa pari makahimo gihapon sa pagpanalangin kaniya tungod ning maong pagtulon-ang doctrinal.

 Makapanalangin sila kaniya o sa ilang mga anak isip mga ginikanan ug wala nay lain pa.

Sa laing bahin usa ka dakong kalibog usab kun maghisgot kita sa liturhiya kun maghisgot kita sa pagpandong sa mga kamot sa mga layko. Kini tungod kay ang panalangin gikan sa pari lahi gikan sa mga layko. Mao nga dili maayo ug makalibog sud-ongon nga ang mga kaparian kun mopandong sa ilang mga kamot agig panalangin ngadto sa uban ang pagaubanan usab og mga layko nga mohimo sa susamang akto.