EDITORYAL — MRT sa Bohol

Maayo ang plano sa Bohol nga pagtukod og Metro Rail Transit isip alternatibong pangpublikong transportasyon. Dili lang kini maayo para sa mga Bol-anon kondili hasta pud sa mga dumuduong ilang na sa mga turista.

Ang Bohol mao ang dunay pinakadako og populasyon sa tibuok Central Visayas nga dunay 1,394,329 nga populasyon basi kini sa 2020 census, napun-an na gyud kini karon paglabay sa lima ka tuig. Ang Bohol dunay total land area nga 411,726 hectares ug 73 ka mga gagmay nga mga isla.

Itandi sa Cebu, nga dunay 3,325,385 nga populasyon sa samang census, halos katunga ra ang populasyon sa Bohol. Ang isla dunay 4,468 square kilometers (446,800 hectares) nga total land area.

Ang Bohol sama sa Sugbu adunay daghang mga tourist destinations nga nabaniog na sa kalibotan ug pirmeng bisitahon sa mga langyaw ug lokal nga turista kada tuig.

Posibleng daghan pa kaayo kini og mga tinagoan nga wala pa madiskubrehi o ma-develop isip tourist spots tungod sa kakulangon sa access roads o mga dalan nga makapapaspas sa paglambo sa mga lugar.

Sukwahi sa gipili sa Cebu City, nagtinguha si Bohol Gov. Erico Aristotle Aumentado nga patukoran og MRT ang iyang probinsya imbes nga Bus Rapid Transit.

Ang BRT project sa Cebu City hangtud karon wala pa gihapon mahuman ug naputos pa og daghang kontrobersiya. Ang tumong ani unta mao ang pagpamenus sa problema sa trapiko sa Cebu City.

Apan tungod dugay nasugdan gisaway kini sa uban kay wala nay kapuslanan ang tumong sa pagtukod niini tungod lahi na karon ang sitwasyon sa trapiko.

Kaning MRT kun itandi sa BRT, mas moderno ug mas malungtaron ang benepisyong makuha sa mga sumasakay, tungod kay duna man kini kaugalingong ekslusibong riles nga agianan.

Sukwahi sa BRT nga nakig-share ra gihapon sa kaniadto naghuot ng daan nga mga dalan.  Maayo unta og hapsay ra para sa mga Bol-anon nga matukoran sila aning MRT ug dili maparehas sa Cebu City nga naabtan pa og dekada ayha nasugdan.