Rodrigo giaresto, mga nagpangga miprotesta

Nakurat tibuok kalibotan dihang mibuto ang balita sa pagkaaresto ni kanhi Presidente Rodrigo Roa Duterte (PRRD), kinsa giatngan nang daan ang ayroplanong gisakyan gikan sa Hong Kong, sa daghang polis, pinangulohan nila: Philippine National Police Chief Rommel Marbil ug Criminal Investigation and Detention Group (CIDG) chief, Police Major General NicolasTorre III didto sa Ninoy Aquino International Airport (NAIA) sa miaging Marso 12, 2025.

Bisan walay ikapakita si Torre nga hard copy sa warrant of arrest nga gikan sa International Criminal Court (ICC) dihang gipangayoan siya niini ni PRRD, diin gamit ang selpong gibitbit, igo rang gibasahan sa CIDG chief og Miranda rights si PRRD, wala gyod makahunahuna kon husto pa ba iyang gibuhat?

Hinunoa, Ila gyong gidakop si PRRD. Ug inay iagi unta og korte sa Pilipinas aron makapanalipod sa kaugalingon batok sa mga akusasiyon, gidretso nilag tahan sa Interpol ug pagka gabii, sakay sa pribadong jet plane, gidala paingon sa ICC  Detention Center, Hague, Netherlands.

Nagpiyesta sa kalipay tanang pro-Marcos non-bloody drugs war: druglords, illegal drugs syndicates, mga pamilyang mikontra sa dugoong war on drugs ni PRRD ug labi na ang Commission on Human Rights niining kalamposan nga ilang naangkon. Apan sa samang higayon, milyonmilyong diehard Duterte supporters sa tibuok kalibotan, kinsa nakasaksi sa iyang pagka-best president sa Pilipinas ang nakahilak sa tumang kalagot-kadismaya-kasakit ug kaguol tungod niining gidangatan sa gihigugma-gipangga nilang Tatay Digong.

Dihadiha, nagdungan sa pagpanggawas ang bagang duot sa mga dumadapig (nationwide ug worldwide). Diin, sa luhaan nilang mga mata ug nagtibing mga baba, gibuhos ang kinasipaan nilang singgit sa pagprotesta. Bisan mga Overseas Filipino Worker (OFW) sa Netherlands, nagtapok atubangan sa Sceveningin Prison dala ang mga plakards-protesta, diin pag-abot ni PRRD, sa dili masabot nilang gibati, miwarawara sa ilang kamot dungan ang pagsiyagit: “Send him back! Send him back! Send him back!...”

Ingon niini kabililhon si PRRD, sa katawhang nakatagamtam og tinuorayng lami sa pagpangalagad diha sa iyang pagka-good-governance leader. Apan anugon!  Kay inay ipadayon ang maong maayong binuhatan sa pangulong mipuli kaniya, gitraydor hinuon siya ug gitugyan ngadto sa mga langyaw aron bilanggoon ning inihap na lamang mga yugto sa iyang pagpakabuhi.

Oh, what a sad reality!