Kurog ni Boying
Kon tinud-on ni Ombudsman Boying Remulla ang pag-imbestigar sa flood control projects sa Sugbo, angay’ng kuyawan ang lokal nga mga politiko, mga opisyal sa Department of Public Works and Highways (DPWH) ug kakonsabong mga kontraktor.
Kay kon nasubay ni Remulla ang sapaw-sapaw nga mga kompaniya nga gipasanginlang nitago sa alegasyon sa pangawat ug sa giingong kinawat ni kanhi House Speaker Martin Romualdez, dili luwas ang sekreto sa kickbacks sa ilang mga proyekto ug paggamit sa kuwartang kinawat sa pagpamalit og kabtangan nga gibutang sa mga ngalan sa ilang mga paryente ug mga higala.
* * *
Mas daling matultolan sa mga imbestigador sa Ombudsman sa Sugbo, ginamit ang mga taktika batok ni Romualdez, ang gitukod nga kabalayan ug gipamalit nga mga sakyanan ug kayutaan ug giapilan nga mga negosyo aron nga dili moawas ang cash vaults ug dili masubay sa mga bangko.
Dili maglisod silang Remulla ug kaubanan sa pagkonektar sa ilang mga biyahe sa Uropa ug ubang kanasuran (pinaagi nagkadungan nga mga aplikasyon sa bakasyon sa mga kongresista, mayor ug kapitan) ngadto sa substandard nga mga proyekto nga nadaog sa paborito nilang mga kontraktor.
* * *
Ang maayo balita para sa mga gipasanginlan sa kinawatay sa P60 bilyones nga flood control projects sa niaging unom ka tuig mao ang posibilidad nga nagpaukyab ra si Remulla sa mga sakop sa media. Makaginhawa sila og luag kon walay mahitabo sa mosunod nga mga adlaw.
Timan-i ang iyang pasalig nga hinog nang mga ebidensiya batok nilang Senador Joel Villanueva ug kanhi Senate President Chiz Escudero. Nga nikalit og kahilaw dihang nibali sila sa majority bloc.
* * *
Angay silang mangaliya nga ang tinuod nga tuyo ni Remulla sa pagduaw sa Sugbo niadtong Lunes mao ang pagsusi sa mahalong kabtangan nga gikatahong napalit sa iyang paboritong target nga si Romualdez. Tingali gi-utingkay na kon girehistro ba sab ang binilyon ka pesos nga commercial strips sa samang mga kompaniya.
Pero nilili na man lang gyod sa Sugbo, nganong dili na man sublion ang mga proyekto sa mga kongresista nga wala mobotar para sa impeachment ni Bise Presidente Sara Duterte ug, aron dili kapasanginlan nga namolitika, sa mga alyado nga dili ingon niana kasuod ug kamapuslanon?
* * *
- Latest
