Balde batok sa Monster El Niño

"Bumili na kayo ng balde para pag umulan kolektahon na ninyong lahat" Kini ang pamahayag ni Presidente Bongbong Marcos Jr. taliwala sa pagpangandam sa kusog kaayong El Niño o mas naila nga Super El Niño.

Naligo gyud intawon sa saway ang pangulo sa iyang gitambag sa mga tawo pastilan. Una, sabton nato ang iyang gipadayag nga concern lang siya sa mga ordinaryong tawo nga balde lang seguro ang ma-afford sa pagkakaron isip pundohanan og tubig.

Mora’g simbolismo lang seguro ang balde aron maka-relate ang tanan ug masabtan ang iyang mensahe. Apan bisan unsaon nako og sabot, mora’g mopatigbabaw man gyud ang akong lahi nga interpretasyon niini nga hilabihan ra gyud ka taphaw ug gaan kaayo ang gihimong pagpangandam sa kagamhanan sa katalagman nga makapakurog sa kaunoran.

Gihulagway na kini sa mga eksperto sa pagtan-aw sa panahon nga super o binisay-on nalang nato bi "GAMHANAN" nga katalagman, apan balde lang ang himoon natong taming batok niini?

Seryoso ba kaha ang atong kagamhanan sa mga gihimong lakang sa pagluwas sa mga tawo nga maapektohan niining super disaster nga anaa na sa atong nataran karon?

Paita na man gyud sa atong kahimtang. Sa pagkakaron, nagkamang na ang mga tawo ilabi na kadtong mga kabus kay taod-taod na nga nasinati ang krisis sa krudo ug sa panarbaho, ug mosamot pa kini sa umaabot nga mga adlaw.

Sa tinuod lang, ang balde nga gi-mention sa presidente huyang intawon kaayo kana ug dili gyud kaigo nga pundohan og tubig.

Dili man gani kaigo ang sulod sa usa ka baldeng tubig nga normal size sa pagbubo sa kasilyas kon mabara kini, unya mao na hinuon kini ang gihimong simbolo sa pagpangandam sa Super El Niño.

Nagpaila lang nga walay hanaw ang presidente sa kahimtang sa mga kabus—wala siya kasuway og gamit og balde o wala gyud gani makaila og balde.

Mas maayo unta kon nag-mention siya og balde kon libre kining ipanghatag sa gobiyerno ngadto sa mga tawo ug dunay pakapin nga bugas nga malung-ag sa mga tawo nga makasinati og gutom inig abot sa panahon.

Basin pagdayeg pa ang iyang madawat gikan sa mga tawo. Sa tinuod lang, wala pa gyud nakalatag ang gobyerno og konkretong lakang sa pagtubag sa suliran nga mamugna niining gamhanan nga katalagman, maong ipasa nila ang responsibilidad ngadto sa katawhan.

Tinuod nga mohimo usab kitang tanan sa atong share sa pagluwas sa atong kinabuhi ug sa atong pamilya, apan limitado kaayo ang atong resources—gawas lang niadtong mga adunahan nga dili gyud makatagamtam og kalisud, ilabi na kadtong dagko na og natigum gikan sa ilang nakawkaw sa kaban sa katawhan.