EDITORYAL - Leksyon ni Tino

Kumusta na kaha ang mga nabiktima kaniadto sa bagyong Tino dinhi sa Sugbu usa ka tuig nga ang nakalabay. Napahiluna na ba kaha sila ug nakabangon og balik?

Lpad kaayo ang kadaut nga dala sa maong bagyo ilabi na sa mga lungsod sa Consolacion, Liloan ug Compostela  nga lapad nga lugar nila ang gilunopan sa tubig tungod sa pag-awas sa mga kasapaan.

Dunay mga nakalas gikan sa Talisay City, Cebu City, Mandaue City u gang nahisgutang mga lungsod sa tungod sa pagkaanod sa baha kay ang ilang mga panimalay naa nahimutang sa kilid sa mga dagkong sapa niawas sa tubig.

Pipila nila ang nagpaabot pa daw gihapon sa ayuda sa gobiyerno kay hangtud karon wala pa sila tabangi.  Dili unta ni saypon og sabot sa publiko, nga basta maigo sa katalagman kinahanglang duna gyud dayuy ayuda nga madawat gikan sa gobiyerno ug labaw sa tanan, obligahon ang gobiyerno nga tabangan sila.

Ang pinaka-importanteng ayuda mao ang luwas nga lugar para mabalhinan, layo sa ilang naandang gipuy-an nga peligroso.

Pero sa wala pa kinin nahitabo, hagbay ra silang gipahimangnoan nga dili luwas mopuyo sa pidpid sa mga sapa ug mga tiilan sa mga bukid tungod kay peligro gyud kaayo kana nga mga dapit kun dunay kusog nga ulan.

Subo lang nga ang  mga hingtungdang mga residente nga buot luwason sa gobiyerno dili man gustong magpa—istorbo sa ilang kasamtangang gipuy-an. Dili sila gustong mopahawa para mangita og mas luwas nga dapit.

Daghan ang nangaanod sa kalit nga pagsaka sa tubig baha apil ang ilang mga kabtangan. Human sa katalagman, ang gobiyerno gihapon maoy nangita og paagi para sila tabangan, kun madelatar kini, ang gobiyerno na sab maoy basulon.

Kinahanglan unta nga paminawon sa katawhan ang mga pahimangno ug pasidaan sa gobiyerno ug dili isugal ang ilang kinabuhi mintras duna pay panahon. Ang butang mabalik pa, pero ang kinabuhi, dili.

Sa habig sa gobiyerno, kinahanglan pud unta nga seryusohon nila ang tumong nga luwason ang tanang naa sa peligrosong lugar. Pinaagi sa pagpangita og haom nga relokasyon.

Daghan ng katalagmang nahitabo. Apan wala gyud motuhop sa tanan ang mga leksyon.