EDITORYAL — Task force way mahimo?

Walay kataposang task force o pagporma og task force kontra ana, kontra ani. Apan hangtud karon walay nakitang dakong kausaban o nahimo para sa tumong nganong giumol kining tanan.

Bag-o lang nagtukod na sad og task force ang Cebu City pinasikad sa Executive Order No. 117 aron maporma ang Cebu City 3-Meter Easement Recovery Task Force nga ang tumong mao ang pagbawi sa 3-meter easement zone sa kilid sa mga sapa o agianan sa tubig sa tinguhang mahunong na kining pagsige og baha.

Ang naka-apan lang, kani nga task force dili basta-basta maka-demolish sa mga estraktura o maka-deklarar sa mga estraktura nga illegal kung walay balidasyon gikan sa mga technical offices ug kung wala mosunod sa due process.

Kani nga task force way kalainan sa nangaging gipang pormang task forces, Dili ba kaha ni kutob ra gihapon sa papel, kutob ra sa estorya, kutob ra sa paghot apan walay paak, o way ngipon batok sa mga lig-ong babag?

Sa panahon ni kanhi mayor Michael Rama nagtukod sab og sama niini katong Task Force Gubat Kontra Baha. Sa sinugdanan, maayo kaayo. Napapahawa ug gidemolis ang mga estraktura apil ang mga pobreng namuyo.

Pero pag-abot sa parte sa mga sapa nga ang nakasambol nga estraktura gipanagiya og dagkong negosyante o establisamento, kutob ra diha. Wala na moirog pa.

Karon gusto napud maghimo og kaparehas gihapon nga task force, maayo unta og kaning bag-ong mugna makapabungkag na gyud sa mga estrakturang kublan nga mao nalay nagpabiling babag sa mga sapa karon.

Kay kung dili, makaduda na gyud kung unsay tumong nganong karon pa ni gitukod ang bag-ong task force nga hapit naman sab ang eleksyon.

Sunod tuig daghan nasad mga prohibisyon nga ipatuman tungod sa umaabot nga eleksyon sa 2028, paigo pa kaha ang panahon aning task force?

Sayud naman daan ang tanan nga pwerteng langaya moepekto ang mga gipangsaad sa mga opisyales sa gobiyerno kay taas kaayo ang balidasg yon, proseso ug uban pa,  bisan pa og pisikal nga makita ug klaro na kaayo ang kalapasan, kinahanglan pa gihapong tun-an ug debatihan  og maayo kun illegal ba o dili.

Dili importante nila ang resulta maong mailisdan nalang og liderato wa gihapoy nabuhat sa gisaad.