Dili maayo mayor

Sayop ang hukom ni Bantayan town Mayor Orlando “Alex” Layese nga sugod kagahapong adlawa dili na kuno mohatag og libre nga serbisyo ang lungsod sa mga mogamit sa ilang ambulansyia.

Gipahibawo kini ni Mayor Layese human nga ang Bantayan Municipal Council miiban og P24 milyones sa giduso niyang Annual Budget para sa tuig 2027, ug wa na kuno hatagi og budget ang gastohan sa ambulansya.

Daghan kunong serbisyo sa lungsod nga maapektohan tungod sa paglaslas sa konseho sa giduso niya nga budget. Nganong nakaingon ko nga sayop ang hukom ni Mayor Layese nga undangon niya karon ang free service sa ambulansya?

Ang annual budget para sa gastohanan sa lungsod sa Bantayan giaprobahan na sa Municipal Council sa miagi pa’ng tuig, ug ang budget hangtod pa kini karong Disyembre 31.

Nasayod man ko nga tuyo ni Mayor Layese nga putlon ang free service sa ambulansya aron makaamgo ang katawhan sa Bantayan nga dili maayo ang gihimo sa konseho nga gipangulohan ni Vice Mayor Arthur Despi.

Dili sila kauban og partido si Despi ug si Layese, mao nga gubot sila karon. Kon putlon man gani ni Layese ang free service, nagpasabot nga mobayad na kadtong mogamit sa ambulansya, unya na sa bag-ong budget.

Kay karong tuiga, ang budget nga gigahin para sa gastohan sa ambulansya, aprobado na man sa konseho kaniadto pang miaging tuig. Ang budget nga gilaslasan sa konseho, para man kini sa sunod tuig.

* * *

Nakontrobersyal pagsamot karon ang Bantayan tungod kay ang 178 ka sakong bugas-humay nga gipalit sa lungsod aron unta ipanghatag sa mga tawo, gipangbukbok na lang.

Ang siyam ka toneladas nga mga bugas gipanglubong na lang nga wa kapahimusli. Ambot nganong wa man dayon mahurot ang 350 ka sakong bugas sa pagpanghatag, ug naabtan hinoon sa election ban period sa miaging 2025 elections.

Miingon si Layese nga pag-turn over sa mga bugas atol sa paglingkod niya sa katungdanan, nangadaot na ang maong mga bugas. Anugon kaayo ang kuwarta nga gipalit sa maong mga bugas nga dul-an sa tunga sa milyon, unya wa ra kapahimusli.

Maayo tingali nga himoan kini og imbestigasyon sa Ombudsman pinaagi sa pagpahigayon og moto propio investigation aron nga ang mamatud-ang sad-an, masilotan.

Ang tunga sa milyon ka pesos nga gipalit sa maong mga bugas anugon kaayo alang sa lungsod nga nihit og salapi nga magamit para sa pagserbisyo sa katawhan.

Unta, menosan sa mga opisyal sa Bantayan ang pagpamolitika tungod kay layo pa kaayo ang sunod nga eleksiyon.