Sara napalit na?
Samtang wala motarung pagtubag sa mga pagduda nga napalit siya sa China, gilubag hinuon ang istorya pinaagi sa pagpasangil nga giisip sa administrasyon nga hulga sa nasudnong seguridad ang pakig-negosyo sa China, dunay nasulti si Bise Presidente Sara Duterte. Nga makatabang sa mga imbestigasyon unsay tinuod niyang relasyon sa nasud nga nangilog sa dakong bahin sa atong nasudnong teritoryo.
Matod ni VP Sara ang sulti ni Presidente Ferdinand Marcos Jr., nga seryusong hulga kon tinuod nga nakadawat siya og kuwarta sa China, nagpasabot nga giisip siyang hulga sukad sa 2023.
* * *
Wala maghisgot si Marcos Jr. nga hulga sa nasudnong seguridad ang pakig-negosyo sa China. Istorya ra na ni VP Sara. Gani, ang gobyerno dunay ekonomikanhon nga kasabutan ug nitabang sa pribadong mga kompaniya nga dunay mga transaksiyon sa negosyo uban sa China.
Mas kahibulongan ang paghisgot ni VP Sara sa 2023. Nga wala sab maapil sa sulti ni Marcos Jr. Kon dili pa limtanon si VP Sara, tam-is pa ang relasyon sa UniTeam tulo ka tuig ang nilabay. Wala pay Maisug rallies. Nagtawganay pa sila sa presidente og BFF.
* * *
Maong dili kalikayan ang pagduda nganong nipasangil man si VP Sara nga giisip na siyang hulga sa administrasyon sukad sa 2023? Tungod ba kay dunay nahitabo sa iyang relasyon sa China niadtong 2023?
Kon mga dokumento sa impeachment trial ang basehan, 2023 nisulbong ang kuwarta nga nadawat sa Cale88 Foods Corporation gikan sa China. Bisan walay trabahante. Mas dako ang nadawat nga kuwarta kay sa halin sa banana chips nga ilang gitug-an sa Bureau of Internal Revenue.
* * *
Labing epektibong tubag sa binuang nga tubag ni VP Sara mao ang pagsuway og tul-id sa iyang pagsimang sa istorya. Iyang tulibagbag sa China nagpasabot ba nga nagsugod na og dawat og kuwarta gikan sa China sa 2023?
Nga ang dakong kuwarta nga nadawat sa Cale88 dili lang para sa gipatuo nga export sa banana chips? Nga posibleng gipakapin na ang pagpakahilom sa tanang mga pagpanghasi sa China sa West Philippine Sea?
Nga posibleng naglakip sa pasalig nga kon si VP Sara nay magtungkawo sa Malakanyang sa 2028 ihatag na sab ang Palawan ug Batanes?
* * *
- Latest
