Problema sa VSMMC

Sentro na usab sa kontrobersiya ang Vicente Sotto Memorial Medical Center o VSMMC nga nahimutang sa dakbayan sa Sugbo gumikan niining dugay na kaayo nga problema.

Ug kini mao ang reklamo sa mga tagtungod sa mga pasyente nga anaa na lamang intawon sa daplin sa karsada nag-estambay. Kini tungod kay usa ra ang gitugotan sa hospital management nga mobantay sa pasyente.

Dili nato mabasol ang mga tagtungod sa mga pasyente. Gikan pa sila sa lagyong dapit sa probinsiya sa Sugbo ug mga silingang lalawigan. Mao nang daghan gayud ang mokuyog sa pasyente.

Usa kini ka talan-awon nga miani og dakong debate sa social media. Ang uban mitulisok sa management sa hospital ug kagamhanan sa lalawigan nga wala kuno magtagad sa maong problema.

Apan dili usab angay nga basta na lamang batikoson ang Kapitolyo tungod kay dili man kini ang nagpadagan sa maong hospital kondili ang Department of Health.

Direkta gikan sa national government ang budget sa hospital matag tuig.

In fairness sa kagamhanan sa probinsiya, kamulo kini karon og pagpalambo sa mga provincial ug district hospital sa lalawigan.

Kini aron dili na unya molalin nganhi sa dakbayan sa Sugbo ang mga pasyente sa probinsiya sa ilang pagpatambal.

Hagbay ra kini nga problema sa mga adunay pasyente sa VSMMC. Kay lagi dili motugot ang management sa hospital nga daghan ang mobantay sa ilang pasyente kay maghuot kuno sa kuwarto o ward sa maong tambalanan.

Mao nang angay lamang nga mohimo og lakang ang management sa VSMMC niining maong problema. Salikwaot tan-awon nga usa sa mga modernong government hospital ang VSMMC sa nasud apan kulang kini sa lakang pag-amuma sa mga tagtungod sa mga pasyente.