Simbagat uban ni Tay Inting

Nahimong pakatawa kining maong termino kaniadtong seminarista pa ko hangtud nga ako karon padre kura na.

Gitawag kini og Simba ug Bagat-bagat sa hinigugma. Kasagaran mahitabo kini sa katapusang misa sa adlaw nga Domingo.

Kining maong panghunahuna ug tinguha nisantop sa dihang padulong Nakong matulog. Samtang akong gi proseso ang kalihukan sulod sa akong hunahuna ug galamhan.

Karong mga panahona gikinahanglan ang paggiya kanila nga nisulod sa maong relasyon. Kalambigitan nga pinasikad sa kaputli ug dili sa kaulag.

Sa gugma ug pagtahud ug dili sa pagpahimulos. Kalambigitan nga balaanon ug dili lang kalibutanon.

Ang maong proseso magdapit sa mga hingtungdan nga mohimo og publikong panaad sa pagpuyo sa kinabuhi nga putli ug maampoong panaw ingon nga manag-uyab.

Unsa man ang ilang apostolado? Ilang misyon ug apostolado mao man ang pagpakaylap sa pagtulon-an nga ang tinuod nga gugma makapaabot sa tukmang panahon ug higayon.

Unta kining maong tinguha mahatagan og katumanan. Kay karong panahona usahay hisaypan ang gugma nga butang sekswal lamang ug nahanaw na hinuon ang espirituhanong diwa niini gumikan sa sayop nga pagsabot ug pagtulon-an.