EDITORYAL - Nakagamot na

Sagunson ang malampusong anti-illegal drug operation sa mga otoridad sa nanglabay nga mga adlaw partikular na dinhi sa Sugbu diin kinilo-kilo gyud nga mga illegal nga drugas ang nasakmit.

Apan ang makapa-alarma og maayo, ang mga nangadakpan dili mga notadong druglords kondili mga ordinaryong mamumuo o yanong mga tawo.

Ang pinakadaghan nga nasakmit sa usa lang ka operasyon karong tuiga mao kadtong habal-habal driver nga nakuhaan og 41 ka kilong shabu diha sa barangay Mabolo sa Cebu City.

Kaniadto, ang mga notadong drug suspects nga nangadakpan sa operasyon nakuhaan ra man og usa ngadto sa lima ka bulto (tag 25 gramos kada usa) gitawag naman nga mga bigtime druglords.

Pero karon mura naman lang og ordinaryo sa usa ka habal-habal driver ang pagbaligya ug paghatud og kinilong shabu.

Kung subayon og maayo ang mga anti-drug operations sa una sukad gasugod ning kinilo-kilong shabu nga nakasulod dinhi sa nasud,  gasugod tanan sa dihang nidagsa ang mga Chinese dinhi.

Dili tanang Chinese nga nanulod sa Pilipinas nalambigit sa sindikato sa illegal nga drugas, apan dili sad malilong nga tanang nanulod nga Chinese dinhi mga tarong nga turista o negosyante.

Sukad nga nakasulod ug ni-operate dinhi ang Philippine Offshore Gaming Operations (POGO) human gitugotan sa administrasyong Duterte, nibaha sad ang kinilo-kilong shabu dinhi sa nasud.

Niadtong 2015, makadaghan na gisulat dinhi sa Banat News ang pasidaan kabahin sa nahitabo sa Cambodia ug Myanmar diin nag-operate ang mga Chinese online gambling casinos sa pipila nila ka mga probinsya.

Nahimong mga salag sa krimen, illegal nga drugas, prostitusyon, kidnapping, extortion, pagpatay, rape, scam hubs ug human trafficking kaning mga probinsyaha sa Myanmar ug Cambodia hinungdan nga gibuhat nila ang tanan para sila mapalayas.

Apan bukas sa kasingkasing silang gidawat dinhi sa Pilipinas uban sa pasalig sa gobiyerno kaniadto nga makakolekta og bilyones ka pesos nga buhis gikan sa POGO, apan nasubli dinhi ang nahitabo sa Myanmar ug Cambodia.

Bisan og gi-ban na kini karon sa administrasyon ni Presidente Ferdinand Marcos Jr., nakagamot na og maayo ang mga sindikato dinhi.

Tungod ba kaha ni naestablisar na og mga koneksyon ang mga sindikato sa mga impluwensyado ug mga opisyales nga naa sa gobiyerno?