EDITORYAL — Hilan ba gyud o reckless driving?

Gitawag na sa mga motorista nga “hilan”  ug “taw-an” kanang eskina sa Osmeña Blvd. ug R.R. Landon Street sa barangay Sta. Cruz sa Cebu City tungod sa sagunson nga mga aksidente sa lugar sa nangaging mga adlaw.

Gani gawas sa mga nangaangol, naa nay  nakalas  nga  kinabuhi ang maong eskina sa miaging buwan. Pero, dili man tingali na tungod kay “hilan” o “taw-an” ang lugar kay wala man kini nahitabo nga ingon ani kasagunson sa una.

Naa sa maong eskina nahimutang ang duha sa mga dagkong pangpublikong eskuylahan sa siyudad, ang Cebu Normal University ug ang Abellana National School.

Nabantayan kaning sagunson nga aksidente sa lugar pipila palang ka bulan ang nilabay. Wala kaayo igdungog ning lugara sa mga aksidente kaniadto. Sagad sa natalang aksidente nahitabo gikan sa lawom nga kagabhion hangtud sa kadlawon.

mga sakyanan diha, apan sukad nga nag-operate na ang ekslusibong lane sa Cebu Bus Rapid Transit murag naay kalibog ang mga motorista sa tayming sa ilang pagliko dihang dapita.

Basi sa mga natalang aksidente diha sa lugar, sagad mabanggaan ang mga sakyanang gikan sa Osmeña Blvd. nga padung sa R.R. Landon, ug ang makabangga mao ang gikan sa Osmeña Blvd.padung sa Fuente Osmeña nga direksyon.  Kasagaran sab, mga motorsiklo ang nalambigit.

Naa bay nakasambol diha sa may CBRT route nganong di man mabantayan nga naay moliko padung sa R.R. Landon?  Magpaturatoy ra man og padagan ang mga motor gikan sa Colon subay sa Osmeña Blvd. mura og wala sila makabantay nga naay galiko.

Maayong tan-awon ni sa Cebu City Traffic Office. Kung puyde i-recalibrate ang traffic light sa lugar para luwas nga makaliko ang mga sakyanan padung sa R.R. Landon.

Pero samtang wala pa kini makorihian sa syudad, mas maayo tingaling magdoble amping ang mga motorista, ilabi na ang mga riders nga moagi sa maong eskina para sa ilang kaugalingong kaluwasan.

Angay gyud unta ang mentalidad nga defensive driving sa tanang oras kun magmaneho sa karsada. Mag-amping nga dili makabangga ug mag-amping nga dili mabanggaan, batasanon ang pagtamod sa “yield” o “giveway” para di madisgrasya.