Mga pilde ni Duterte
Sa unom ka tuig niyang administrasyon, walay nakabaraw ni kanhi Presidente Rodrigo Duterte sa gipasangil nga extrajudicial killings sa drug war, pagkawat sa binilyon ka pesos sa mga transaksiyon sa Covid-19 ug bangis nga mga krimen human gitugtan ang Philippine Offshore Gaming Operators (Pogo) ug e-sabong.
Ganahang mangangkon si Duterte nga walay makaambas sa kasaysayan sa Pilipinas sa popularidad sa iyang pamunoan. Iyang gilaktawan ang pait nga kamatuoran nga nahingpit ang iyang kahawod tungod sa iyang paghudlat ug pagpahilom sa mga institusyon–simbahan, media, korte, negosyo, people’s organizations ug politikanhong oposisyon.
* * *
Pero duna gyod tingali ligid ang kapalaran: Nga ang naa sa ibabaw ipaubos ug ang naa sa ubos ipa-ibabaw. Kay human gipasiatab ang iyang kakublan sa balaod, gihagit niyang tanang kalibotanong institusyon pagpatubag niya sa ilang gipasangil nga kalapasan sa balaod, nadiskubrehan ni Duterte nga tinuod ang laing pasidaan sa atong katiguwangan: Nga kon mag-uwan, mobundak gyod.
Human luwati ang arrest warrant sa International Criminal Court (ICC) batok niya, nagsunudsunod nang pilde ni Duterte nga walay bisan gamay na lang sagol nga daog.
* * *
Niang nagkataas nga lista sa iyang kaapiki:
• Napakyas ang iyang petisyon pagpangayo og temporary restraining order (TRO) sa Korte Suprema, kansang 13 sa 15 ka mahistrado iyang mga tinudlo, batok sa pagdakop niya niadtong Marso 11;
• Bisan ang pagdangop sa fake news sa iyang mga abogado ug mga dumadapig nga nakakuha sila og TRO wala makabaraw sa ayroplano nga nihatod niya sa prisohan sa The Hague;
* * *
• Gisalikway sa ICC Pre-Trial Chamber 1 ang petisyon sa iyang abogado nga si kanhi Executive Secretary Salvador Medialdea paglangay sa una niyang pag-atubang sa korte niadtong Marso kay masakiton ug himatyon siya (kay napamatud-an sa mga doktor sa ICC nga takos ang iyang panglawas ug panghunahuna);
• Gisalikway sab sa mga huwes ang pagkuwestiyon ni Medialdea sa hurisdiksiyon sa ICC nga wala sa saktong panahon kay ang husay sa niaging buwan para lang sa pagbasa sa kaso batok ni Duterte, pagpahibawo sa iyang mga katungod ug pagpangutana sa iyang ngalan; ug sa niaging Semana Santa
• Gisalikway ang petisyon sa langyaw niyang mga abogado paglisudlisod sa mga paryente sa mga biktima sa EJKs sa ilang identification documents.
* * *
- Latest
