Patuyang sa bonus

Naandan na sa kagamhanan sa dakbayan sa Sugbo ug bisan sa ubang local government units (LGUs) ang paghatag og bonus sa mga kawani atol sa Charter Day.

Ang paghatag og anniversary bonus nasubay sa balaod pinasikad sa local budget circular nga giluwatan sa Department of Budget and Management (DBM).  Sa ato pa, way illegal sa pagpanghatag og bonus ngadto sa mga kawani.

Apan angayan tingaling susihon pag-usab ang basihanan sa mga LGUs tungod kay klarong giabusahan ni sa mga opisyal alang sa personal nil aka mga katuyoan. Ang lagda sa DBM nagkanayon nga samtang gitugot ang paghatag og anniversary bonus ngadto sa mga kawani apan limitado ang kantidad niini sa tag P3,000 matag usa.

Kinahanglan sab nga ang kawani nakaserbisyo na og labing minus us aka tuig aron siya makadawat sa maong bonus. Ug nga kinahanglang wa siyay giatubang nga kaso. Gani ang lagda sa DBM nagkanayon nga matag-lima ka tuig lang mahimong manghatag og anniversary bonus ug dili matag-tuig.

Kun dili mahimong kada-tuig manghatag og anniversary bonus, sigun sa lagda sa DBM, labaw na tingali nga di mahimong magpatuyang sa ilang gibati ang mga lokal nga opisyal nga daw nanghatag og ilang kaugalingong kwarta.

Ako ning gihisgotan tungod kay giabusohan sa mga opisyal sa syudad sa Sugbo ang pagpanghatag og anniversary bonus. Tiaw mo bay P35 mil matag-usa ang giaprobahan sa mga sakop sa konseho. Si Mayor Raymond Garcia misugyot lang unta og P25 mil, apan tungod kay gustong magpahumot ang mga konsehal ilang gipalabwan og P10 mil ang sugyot sa mayor.

Ang mayor admitido nga ang gidak-on sa kantidad nga giaprobahan sa konseho may kalambigitan sa umaabot eleksiyon. Klarong gustong magpahumot ang mga konsehal ngadto sa mga kawani ug sa ilang mga pamilya labi pa nga umaabot ang eleksiyon.

Samtang wa koy supak nga hatagan og bonus ang mga kawani aron sila madasig sa pag-alagad sa publiko. Apan di sab tingali angayang patuyangan sa mga opisyal tungod kay di ni ilang personal nga kwarta ug mas gikinahanglan ni sa ubang serbisyo.

Daghan ang angayang unahon sa syudad sama sa pagbayad sa mga utang niini, labi pa gyud sa mga tambalanan aron di maapektohan ang mga kabus nga nagsalig sa hinabang gikan sa CHAMP. Hinaut makaamgo ang mga opisyal sa syudad nga sagrado ang buhis sa katawhan tungod kay singot ug dugo ang ilang puhonan niini busa angayang ampingan ug tarungon sa paggasto.