Napakyas pagbayad sa rent sud na sa tulo ka buwan

Dear Atty. Divine

Aduna koy na-inherit nga house and lot gikan sa akong ginikanan. Tungod kay anaa koy kaugalingong balay busa nakadesisyon ko nga paabangan nalang ang maong property aron adunay income.

Adunay nag-abang niini sukad pa last year. Apan napakyas kini karon sa pagbayad sa iyang rent sud na tulo ka buwan. Unsay angayan nako nga buhaton? Daghang salamat.

Trishia

* * *

Dear Trishia,

Kun aduna kamoy gipirmahan nga Lease Agreement, mas maayo nga imo unang susihon ang mga terms and conditions niini aron ang imong mga lakang ibasi sa unsay inyong nasabutan sa kontrata. Usually,  kun ang renter gani mapakyas sa pagbayad sa abang sud na sa pipila ka buwan, ang  unang buhaton sa tag-iya mao ang pagpadala og demand letter sa nag-abang labot sa iyang bayranan ug hatagan siya og 15 ka adlaw sa pagbayad sa iyang obligasyon. Kon mapakyas gihapon siya sa pagbayad, mamahimong padad-an na usab siya og demand letter nga nagmando kaniya sa pag vacate sa property.

Kun di gihapon siya mopahawa ug di sad mobayad, mamahimo siyang ipatawag sa barangay. Kun di gihapon siya mo settle sa barangay then modangop na gyud ang tag-iya sa korte. Imo siyang pasakaan og kasong ejectment aron ang korte na ang momando kaniya sa pagpapahawa. Kun di siya moboluntaryo sa pag-vacate bisan kun naa nay court Order, ang sheriff na ang mohimo og aksyon aron sa pagpapahawa kaniya. Thank you and God bless. -- Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.