Ilusyon ni Gwen
Dihang gisupak si Gwen Garcia ang iyang pagka-suspenso niadtong 2012, nanagana ang administrasyon ni anhing Presidente Noynoy Aquino sa pagpapahawa niya (igo rang gikandadohan ug giputlan og kuryente ang iyang upisina dihang nigawas para sa Oslob) tungod sa iyang gipasidaan nga lapad nga suporta sa mga Sugbuanon.
Dihang gisupak ni Garcia ang dismissal order sa Ombudsman niadtong 2018, giduphan siya ni kanhi House Speaker Bebot Alvarez tungod sa patuo nga siya ang lider sa minilyon ka mga botante sa Sugbo (gibugtian ni Garcia ang suporta pinaagi sa pagpaluyo sa kudeta batok ni Alvarez sa samang tuig nga gipasiugdahan nilang Bise Presidente Sara Duterte, Senador Imee Marcos ug kanhi Presidente Gloria Macapagal-Arroyo).
* * *
Dihang gisupak ni Garcia ang preventive suspension order sa Ombudsman batok niya sa niaging buwan, gilabanan siyang Presidente Ferdinand Marcos Jr. pinaagi sa pag-awhag nga tahuron ang iyang upisina (sa walay paghisgot sa panginahanglan pagtahud sa lehitimong sugo sa Ombudsman) tungod sa pagtuong si Garcia ang makakumbinser sa 3.4 milyones ka rehistradong mga botante sa Sugbo pagpili sa tanang senatorial candidates sa iyang administrasyon niadtong Mayo 12.
Pero pag-abot sa eleksiyon, si Garcia nakapadaog og usa ra ka senatorial candidate ni Marcos, si Erwin Tulfo nga nahimutang sa ikasiyam nga luna, ug kapin sa milyon ka Sugboanon nipili nilang Bong Go, Bato dela Rosa ug ubang mga alyado ni kanhi Presidente Rodrigo Duterte.
* * *
Sa eleksiyon nga retirado na si Agnes Magpale, nagpakahilom si Ace Durano ug nidangop sa ikaduhang distrito sa Junjun Davide, angayng pasalamatan silang Pam Baricuatro ug Valeriano Gingco nga mao ray nangahas sa paghagit sa kahawod ni Garcia.
Kay gihatagan nila og kapilian ang mga Sugboanon. Nga giluod na sa ilusyon ni Garcia nga siya ang tag-iya sa Sugbo, nga mahimo rang hasion ang mga nisukwahi niya, ma-doktor o ma-negosyante man, nga siya ug dili ang tourist destinations maoy sentro sa atensiyon sa mga turista nga niapil sa Suroy-Suroy Sugbo, nga obligado ang kalibotan nga motan-aw sa iyang mga sayaw sa Sinulog kada Enero ug Pasigarbo sa Sugbo kada Agosto, ug nga kinahanglang kaliboan gyod ang likes ug shares sa TikTok sa iyang OOTD.
* * *
- Latest
