EDITORYAL - Mitingog na ang katawhan

Mitingog na ang katawhan. Sila maoy midesisyon kun kinsa ang ilang hatagan sa ilang mandato aron sila pamunoan ngadto sa kalamboan.

Dili na kini mausab kay gibasi kini sa tagsa-tagsa ka mga tingog pinaagi sa ilang tagsa ka boto sa miaging piniliay sa Mayo 12,2025.

Daghan ang nakurat sa kadakong ‘upset’ sa kasaysayan sa politika sa probinsya sa Sugbu ug bisan sa ubang mga lugar sa probinsya gumikan kay ang mga incumbent nga mga opisyal gipukan sa oposisyon.

Ang nakalabay nga piniliay dunay daghang mga pasangil ug alegasyon sa grabeng pinalitay og boto.  Mga pasangil nga bisan kinsang politiko karong mga panahona dili na gani moreklamo bisan duna pay nasakpang kaalyado sa ilang mga kaatbang nga naghimo ani.

Kini tungod kay nahimo na kining kultura sa mga botanteng Pilipino, nga matag eleksyon duna gyuy mangamang aron paliton ang ilang boto.

Apan duna ba gyuy kasigurohan nga botaran sa mga tawo kadtong mga kandidatong namalit og boto? Bugtong ang nasayod ani kadto rang mga napildi nga nigastos para ani. 

Kay kadtong mga nakadaog, dili naman manumbaling kun kadtong ilang nakamang mao ba gyuy nibotar nila.

Apan usa ray tinuod ani, kadtong nakalabay nga eleksyon nagpakita sa matuod nga gahum sa usa ka boto sa usa ka tawo, adunahan man o bisan pinakakabus sa katilingban.

Kinsa may magdahum nga kadtong mga impluwensiyado, ilado, naglingkod pa sa posisyon ug daghan og kwartang gipuhonan sa eleksyon, mapukan gihapon.

Magsilbi unta kining leksyon sa tanang politiko, nga usahay dili ang kasikat, dili ang kadaghan sa kwarta, dili ang ilang mga nahimo na, mao ray sukdanan sa mga botante pagpili.

Kun unsa ni, sila ray nakahibalo nga angay tan-awon sa mga nangambisyong modagan sab sa 2028 elections.