Unsay nakapilde ni Gwen?

Grabeng pagka hagba sa natad sa politika ni suspended Cebu Governor Gwendolyn Garcia sa tinguha niya nga makapadayon sa iyang katungdanan sa laing termino.

Gipalukapa siya sa kapin usa ka milyon ka botante sa lainlaing kalungsoran sa probinsya nga tingali wa na makaantos sa iyang kamaldita ug sa kabugal-bugalon sa iyang igsuon nga vlogger.

Banabana nako, ang batasan ni Gwen usa gyud sa rason nga daghan ang wa na ganahi niya, ug ang pagka mapahitas-on sa iyang igsuon, nakatampo sab nga nangasuko ang katawhan kaniya.

Unsaon, wa man siya makabadlong sa iyang igsuon nga mihingan og “Mga Oplok” sa mga lumalaban ni kanhi Presidente Duterte, ug kuno “Mga Bogo” ang mga habal-habal driver.

Sa politika dili gyud maayo nga ipasuwabi nimo ang pagka mapahitas-on nga magtuo ka na nga ikaw na’y hawod, kay mangasuko niana ang katawhan nga maoy inyong pangulitawhan atol sa eleksyon.

Kini maoy rason nga gibiyaan pag-ayo si Gwen sa botos nga nakuha ni Pamela Baricuatro. Sa sinugdanan, nakaingon ko nga panington gyud si Pamela sa iyang pakigsangka ni Gwen.

Apan dihang giapil na’g kontra sa vlogger nga igsuon ni Gwen ang radio commentator nga manager sa DYHP, nga igo lang mihimo og mga constructive critisism, diha na nga misamot si Gwen og kahagba.

Dili malalis nga pinaminaw kaayo ang programa ni Atty. Ruphil Bañoc sa kalungsoran, ug ang katawhan nakasabot na hinuon ngano nga dili na siya angayng papadayonon sa pagka gobernador.

Unta, ang bag-ong napiling gobernador dili mahisama kang Gwen, aron nga kanunay siyang panggaon sa katawhan. Si Pamela, anak sa kanhi security officer ni kanhi Cebu Gov. Lito Osmeña.

Kanhi siya international flight stewardess, apan nakatungha sa kurso nga pagka abogado. Sa ato pa, takus si Pamela nga modumala sa probinsya isip gobernador.

Si Gwen pirmi nga mipasiatab nga ang probinsya sa Sugbo maoy labing dato sa mga probinsya sa tibuok nasud. Pero para nako, kon dunay dakong katigayonan ang probinsya, dunay daghang kwarta, gamita kana alang sa kaayohan sa katawhan.

Kon gihimo pa kini ni Gwen, dili unta maglumba paingon sa Cebu City ang mga ambulansya gikan sa kalungsuran nga magkarga og pasyente kay ang mga provincial hospitals sa mga lungsod, dili hitsas sa mga tambal ug ubang kahimanan sa pagtambal.

Unta, kining mao nga punto matan-aw ni Governor-Elect Pamela, kay kon iya kining mahimo, mosamot nga panggaon siya sa katawhan ug yam-iran na gyud nila si Gwen nga wa makahunahuna niini.

Bahala na kon ang Cebu Province dili na maoy labing dato nga probinsya sa nasud, apan hingpit ang iyang pangalagad sa kataw-han sa lainlaing serbisyo.