Hilom lahi pero lawom

Kong si kinsa ang hilom mao gyud ang lawom ug kadtong saba mabaw diay. Mao kini ang nahitabo sa dakbayan sa Sugbo nga taliwala sa kasaba sa kampo nilang Mayor Raymond Garcia ug Atty. Mike Rama, hilom ra riay nga nisirit na si Konsehal Nestor Archival nga nigawas nga mananag pagka mayor sa dakbayan sa Sugbo kauban si Tomas Osmeña nga iyang bise mayor. Halos nanglusot usab ang mga konsehal sa Bando Osmeña Pundok Kauswagan o BOPK.

Sa sinugdanan wala gyud silay kisaw sanglit wala man usay isyu nga gilambigitan sa ilang grupo. Kada adlaw kugi sila nga mag-house-to-house sa kabalayan diin patas sa patag ug kabukiran nga ila gyud giadto ug nakigsandurot sila sa mga tawo nga ilang mahimamat. Nabatyagan ang kamatinud-anon ug sinseridad nila maong sa walay pagduha duha nakuha nila ang pagbati aa mga tawo nga nihatod sa ilang kadaugan.

Solido ang BOPK nga lisod tumpagon sa kaatbang nga napiang ug nabuak na nga mao ang kampo nilang Garcia ug Rama nga kanhi tibuok ug lig-on apan dihang nabuak nagabok ug sayon ra gibuntog sa kagahi sa ilang kontra nga mao ang BOPK.

Balik na usab sa City Hall ang grupo nga kanhi nagmingaw apan nagtigom lang diay og kusog alang sa ilang subling pagbangon.

Labaw sa tanan ang katakos nila ang ang agi nga nakita sa mga molopyo sa dakbayan ang nakaingon nganong nakadaug sila sa eleksyon.

Dinhi nato makita nga dili na madektahan ang katawhan kon unsa ang ilang gustong botaran. Mangopras man og kwarta sa mga politiko apan wais na kay dili naman maulog ulogan sa mga bakak nga pasalig sa mga tawo nga ila nang natilawan.

Ang resulta sa eleksiyon sa dakbayan sa Sugbo nagpakita lang nga dili lang kon si kinsa ang adunay daghan kasikas nga mugnaon ang mopatigbabaw, depende sa kasikas diay kong kasikas nga makaayo sa tawo aw makaayo usab ang ibalos.

Hinuon alang man sa kaayohan ang tumong sa tanan nga nagpapili apan nakita seguro sa tawo ang kamatinud-anon nga maoy misibaw sa gipilo nila karon.

Aduna pay dugang mga katuigan nga mapatud-an si Archival ug mga kauban nga nasulayan na usab ang katakos pero unta masustinihan kini ug mapalambo pa sobra sa iyang gipanaad panahon sa kampanya.

Ang mandato nga gihatag sa mga bag-ong opisyal ug kadtong mga bag-ong daan nga nasoblian unta ang kaayohan sa katawhan nga nagbutang kaninyo sa katungdanan ang inyong unahon ang inyong kaugalingon.