Tiglugos sa kinaiyahan
Di katuohan ang tanang pasalig sa kadagkoan sa Kapitolyo sa Sugbo nga nagpakabana sila sa pagpanalipod sa kinaiyahan sa Sugbo tungod sa sukwahi nilang mga lakang. Gawas sa ilang kapakyas pagpalabong pagbalik sa kabukiran, labing bag-o nilang mga proyekto nagmatuod nga sila mismo ang tigluba sa kalikopan.
Ilang pagpamutol sa mga kahoy sa lungsod sa Poro sa isla sa Camotes, sama sa pag-upaw sa kabukiran sa Cambuhawe sa Balamban, gihimo sa way pagkonsulta sa mga molupyo, ni pagtuon unsaon sa paglikay o bisan pagmenos lang sa daotang epekto sa palibot.
* * *
Ang duha ka proyekto, ang 13.4 ka kilometro nga road expansion project nga nagsumpay sa Poro ug Tudela ug ang road network nga magsumpay sa Trans-Central Highway ug sa bag-ong Capitol building, pulos way pagtugot gikan sa Department of Environment and Natural Resources (DENR).
Karon pa magkara-kara ang mga kontraktor sa ilang mga aplikasyon sa Environmental Management Bureau (EMB) nga naputol nang mga punoan sa kahoy sa Poro ug napahak, naupaw ug nakagis na ang gatosan ka punoan sa kahoy ug tibuok vegetation cover sa kabukiran sa Cambuhawe.
* * *
Kon may pagpakabana sila sa kinaiyahan, nganong gitugotan man sa Kapitolyo ang bangis nga kalapasan sa mga kontraktor? Nahibaw-an lang ang pangabuso sa kinaiyahan sa Poro tungod sa protesta nga gipangulohan sa kaparian ug mga parokyano. Nabisto ang paglugos sa kabukiran sa Camuhawe tungod sa netizens nga ni-post sa ilang mga video ug letrato sa social media.
Imbes mangayo og pasaylo sa mga Sugbuanon sa ilang pagpabaya, giduphan sa Kapitolyo ang duha ka proyekto ug gikasab-an ang mga nangahas pagsupak.
* * *
Labaw'ng di masabtan mao ang ka-inutil sa EMB ug DENR. Nangiyugpos lang bisan sa kadaot sa Poro ug sa mas dakong kadaot sa Cambuhawe. Samtang niluwat og cease and desist order batok sa kontraktor sa Cambuhawe wa mohimo og bisan unsang lakang pagsusi kinsay nagtugot sa proyekto ug kinsay angayng ikiha, silotan ug paninglan sa higanteng danyos. Dunay sukaranan ang mga pagduda. Nga ang EMB ug DENR way mahimo. Kay ang mga proyekto gipasiugdahan sa gamhanan nga mga politiko. Nga di managana pagsugba nila sa kalbaryo kon mangahas sa pagtuman sa ilang trabaho.
* * *
- Latest
