EDITORYAL - Walo ka minutong wali sa mga pari

Si Pope Francis mideklarar nga kinahanglang walo ka minutos lang gyud ang gitas-on sa homiliya o wali sa mga pari diha sa pulpit sa Santos nga Misa sumala pa sa Catholic News Agency nga mikutlo sa iyang pamahayag atol sa katekismong gipangulohan sa lider sa Simbahang Katoliko niadtong Hunyo 12 ning tuiga.

Kay matud pa niya, kun molapas na gani og walo ka minutos dukaon na ang mga nanimba sa pagpaminaw. Tinuod gyud na, mawad-an na og interes ang mga nanimba pagpaminaw.

Ang homiliya matud pa kasagaran gibase kini sa kun unsay gibasa gikan sa Bibliya atol sa misa. Hubaron kini sa pari ug iesplikar sa mga tawo kun unsay mensaheng dala sa maong mga Ebanghelyo o Maayong Balita gikan sa Bibliya.

Mahimo kining hubaron pinaagi sa kasinatian sa mismong pari o mga panultihon ug tulomanon nga nahibaw-an sa katawhan kun naka-relate ba ang mga tawo niini sa ilang tagsa-tagsa ka kinabuhi.

Sa pagkatinuod dili baya kaayo taas ug dili sab kaayo mubo ang walo ka minutos, kaning wali o homiliya sa mga pari magdepende man pud gud kini kun unsa ka maayong manabi ang naa sa pulpito.

Dunay ubang mga pari nga maayo kaayong modiskurso bahin sa Bibliya nga makonektar nila sa kasamtangang sitwasyon sa kinabuhi sa mga tawo.

Usahay para sa mga kabataan, sa magtiayon, pamilya, bisan sa panggobiyerno, mga polisiya ug ingon man mga pangomedya.

Tingali naa ra gyud kana sa mga pari kun paninduton nila ang ilang homiliya nga siguradong mao gyud ilang intensiyon matag sila moselebrar og Santos nga Misa.

Apan usahay duna gyuy mga panahon nga mawagtangan og interes ang nanimba tungod sa kataas na sa oras ug walay unod nga mapunit gikan sa ilang mga gipamulong.

Bisan unsa pa na kataas o ka mubo ang homiliya basta ang pari makamaong mohatud sa mensahe ngadto sa nanimba ug dili makasakit sa dughan ang mga gipamulong dili man tingali laayon ang mga tawo sa pagpaminaw.