Law-ay nga buhat    

Misul-ong na sab ang kabuang niining mga armadong tawo nga magtaptap sa ilang nawong unya magpaila nga polis ug PDEA, unya mamugos pagsu’d og kabalayan, ug ang uban tingali kanila aron mangawat.

Hangyoon nako ang akong amigo nga si Koronel Ireneo Dalogdog, ang director sa Cebu City Police Office (CCPO) ug ang regional director sa Philippine Drug Enforcement Agency (PDEA) nga did-an gyud ninyo ang inyong mga sakop sa paghimo niini.

Klarohon nako nga kon ang gihimo niining mga tawhana mao ang paghimo’g kampanya batok sa gidiling drugas, kay nagduda mo nga ang mga tag-iya sa balay nga inyong sudlon nalambigit sa negosyo sa drugas, pagpaila mo.

Nganong dili man kamo magpakita sa inyong mga nawong? Nganong magtaptap man mo? Kon kamo ang himoan niana nga may mosu’d sa inyong kabalayan ug magtaptap sa nawong unya igo lang moingon nga mga polis, unsay inyong ikasulti?

Ang akong ikasulti nga kadtong mga tag-iya og balay nga sudlon niining mga tawo nga magmaskara, unya duna mo’y armas, sukol mo kay binuang ang ilang gihimo. Kadaghan na ko makadungog ug susama niining maong kalihokan.

Kaniadtong Martes sa kadlawon, ang balay sa magtiayon nga Jimmy ug Brenda Tumarao didto sa Villa del Rio sa Barangay Bacayan, gipugos pagsu’d sa unom ka tawo nga nagmaskara, gipangtionan sila’g armas.

Nagkurog tawon sa kalisang ang magtiayon ug ang ilang kamanghorang anak. Matud pa mga 1:30 sa kadlawon, kalit nangabot ang mga tawo nga nagtaptap sa ilang mga nawong ug kuyog nila ang kamaguwangan nga anak sa magtiayong Tumarao.

Ang anak sa magtiayong Tumarao nga si Vince didto na magpuyo sa balay sa iyang katipon. Giposasan si Vince sa mga armadong tawo ug miadto sa balay nilang Brenda ug Jimmy, dayon nangita sa kwarta.

Unsa man diay to, tulis? Pangawat? Kay wa man sila’y nakitang kwarta, mibiya nga dala gihapon nila si Vince ug didto gibuhian sa dapit nga didto kini nila gikuha.

Kakuyaw sa ilang gihimo. Kon mao na ang himoon sa mga dautang tawo, magpatuo nga polis ug PDEA, dad-on ang tawo nga ilang makursonadahan, unya patyon, pwerteng luoya.

Mao na nga mas maayo tingali nga kon kamong dunay mga lisensyadong armas, pamusila ninyo kining maong mga tawo nga maghimo niini. Ang tarong nga mga polis ug PDEA dili mohimo og ingon niini.

Kon tinuod mo nga mga polis, nganong magtaptap man gyud mo sa inyong mga nawong, hadlok mo? Ayaw na lang pag-polis ug pagpasakop sa PDEA kon talawan mo. Naa pay bakante pagka kargador sa pantalan.