VP Sara miresayin kay hinog na

Mibaha ang reaksiyong nagkalidades human gikuninitan sa mainstream-social media ang pagtunol ni Vice President (VP) Sara ‘Inday’ Duterte og irrevocable resignation ngadto kang Presidente Bongbong Marcos (PBBM) isip Department of Education (DepEd) secretary ug co-chairman sa National Task Force to End Local Communist Armed Conflict (NTF-ELCAC) sa miaging Hunyo 19, 2024.

May nangalipay, naguol ug nahinugonan. Sa nangalipay, adunay duroha ka matang sa panagway: ang mga buayang gutom, kinsa kaalyado ni First Lady Liza Araneta-Marcos nga nag-iyahay gilayon pagbuka sa ilahang naglaway'ng baba – nagdungan pagyangoyango kay gustong maoy pilion ni Liza sa paghulip.

Usab, ang diehard Duterte supporters (DDS), kinsa hagbay rang nanawagan nga dapat mobulag na si Inday sa pagka-miyembro sa gabinte ni PBBM nga gilangkoban sa mga korap, ning pagresayin ni Inday, sila nangalipay.

Sa daghan nga naguol, usa na ang mga magtutudlo.  Dili nila malimtan giunsa sila sa paghigugma-pagmatuto-pag-inspire ni Inday, kinsa the only DepEd secretary nga nakahatag nilag 30-day straight break without volunteer work nga benepisyo.

Ug sa mga nahinugonan, si Senador Sherwin Gatchalian, emosiyonal mipadangat sa iyang grabing pagdayeg-pasalamat ni Inday, kinsa pokus kuno kaayo sa iyang trabaho.

Matag semana, magmiting gayod ang DepEd, diin tanang hingtungdang representate motambong gayod, nakipag-ambitay sa mga maayong pamaagi uban sa Senador, iyang Education Committee ug sa open-minded and decisive leader nga Inday, unsaon mapalambo ang tabangonong edukasiyon sa Pilipinas. Basta, matod pa ni Sen. Gatchalian, nindot ikauban sa trabaho si Inday.

Kay makagaan-makadasig-makagiya sa tukmang dalan paingon sa mahayag nga kausaban.

Apan anugon, kay inay hatagag dakong pahat sa confidential fund, nagpangayo lang intawon sa presidente.

Unya dihang gihatagan, mao pay gikuwestiyon sa Kongreso ug Senado. Bise-presidente man unta si Inday, unya nganong wala man duphi sa presidente? Gipasagdan ra mang daogdaogon-kulatahon?

Moduha ka tuig na hapit nga gibuhat kini sa administrasiyong Marcos kaniya. Nakita ni Inday, wala nay pagmahal si PBBM sa atong nasud ug katawhan. Siyay naulaw sa gihimo ni PBBM.

Miawop na iyang pasensiya ug ania miabot ang gikatakdang panahon nga hinog na si Inday sa punoan. Diin, mapaambit lamang iyang katam-is ngadto sa katawhan oras nga mobulag siya sa gabinite ni PBBM.

Unta, makatagamtam tanan!