EDITORYAL - Bulok nga kultura tungod sa social media

Ang social media nagsilbi na karong tinubdan sa mga impormasyon ug usahay nagsilsil ug mga ideya, sayup man o husto sa alimpatakan sa publiko tungod sa naghitak sab nga mga misinformation, disinformation ug fake news.

Gigamit sab kini nga kahimanan sa pagguba sa reputasyon ug imahen sa uban ug sa samang paagi gigamit pagpahumot ug pagpanindot sa pangalan sa uban. Depende nalang kung kun kinsa ang gipahinungdan ug kun unsa ka maayo pagkabuhat ang mga posts.

Nagmugna kini og mga opinyon nga lisud na usbon sa hunahuna sa mga tawo ilabi na kun kadaghanan sa ilang nabasa sa social media kaparehas sa ilang panglantaw.

Mao kini ang naobserbahan karon ning bag-o diha sa social media. Dunay ubang netizens ang di kadawat sa pagpawalay sala kang De Lima sa korte sa tanang gipasangil nga mga kasong may kalambigitan sa illegal drug trade.

Si De Lima gikasohan og tulo ka mga kaso nga pulos tanan may labot sa illegal drug trade sa National Bilibid Prisons sa dihang milingkod si kanhi presidente Rodrigo Duterte.

Apan ang iyang kaso, wala molihok hangtud naabtan nalang sa pagtapos sab sa unom ka tuig nga termino ni Duterte.

Sa dihang padung na og kapupos ang termino ni Duterte, naghinayhinay og kahugno ang lig-on kuno nga kaso batok sa senadora.

Nangamatay ang pipila sa mga “testigos” nga mga inmates ra pud tungod sa sakit, kadtong mga opisyales mismo sa Bureau of Corrections ug kadtong nahibiling buhi pa nga mga inmates nga testigos mibakwi sab sa ilang mga pinanumpaang pamahayag batok ni De Lima.

Mao nga sa dihang gihusay na sa korte ang iyang kaso, natural gyud nga makitang inosente siya sa mga pasangil.

Apan bisan pa niini, di na mabalik pa ang mga katuigang gihikaw kang De Lima, labaw ng dili mabalik ang naguba niyang dungog ug reputasyon.

Kay diha sa social media dunay mga netizens nga padayun gihapon pagtamay kaniya ug pagtawag kaniya og mga pangalan nga daw personal silang dunay kasayuran nga nalambigit gyud sa illegal nga drugas ang kanhi senador.

Ingon niana kadako ang danyos sa kultura sa mga Pilipino niining sayop nga paggamit sa social media.