Tanan may kahigayonan

Gibutyag ni Bise Presidente Sara Duterte ang laraw sa banay’ng Duterte nga tulo ka miyembro sa ilang pamilya ang modagan pagka-senador sa midterm elections karong Mayo 2025 ug aduna pu’y modagan pagka-Presidente sa 2028 elections. Managlahi ang panglantaw sa mga political analysts ni’ng maong laraw sa mga Duterte.  Kon unsa man ang ilang tinuod nga katuyoan, anaa gihapon sa katawhan ang pagbuot kon hatagan ba nila kini’g katumanan.  Kay ginaingon man nga “Dinhi sa Pilipinas, ang tanan may kahigayonan nga mahimong senador o presidente…ug gani, kana man maoy dako’ng suliran.  Fezteleern!

Dili sad imbitahon

Misugyot ang usa ka maritime law expert ug UP associate law professor nga si Jay Batongbacal nga manawagan ang Pilipinas sa laing mga nasud nga putlon na nila ang pakigrelasyon sa China Coast Guard (CCG) human sa bayolente nga panghitabo didto sa Ayungin Shoal.  Nagpahipi niini’ng maong sugyot ang pag-angkon nga, sa atong kaugalingon lang, wala na gayod kita’y ikabatok sa China. Makapahinumdum kini sa bata nga nasuko kay wala imbitaha sa hikay sa death anniversary sa Lolo  sa iyang kadula.  Agi’g bawos, miawhag siya sa iyang mga kauban nga dili na nila amigohon ang maong bata dungan sa pag-ingon nga, “Sagdi lang Bay, inig kamatay sa akong Lolo, di sad na siya nato imbitahon sa kaon.” Pagkatoytoy!

Nagbubalitok nga pamahayag

Gipadayag ni Senador Imee Marcos, ang iyang kalibog sa giingon’g pagpbubalitok sa pamahayag sa Executive Department kabahin sa panghitabo niadtong Hunyo 17 sa Ayungin Shoal.  Gitawag ni Defense Secretary Gibo Teodoro ang panghitabo nga “babag sa kalinaw ug kahapsay sa South China Sea”. Apan alang kang Executive Secretary Bersamin, ang nahitabo aksidente lamang o wala pagsinabtanay.  Dili na ba gyud kita makapaabot nga magkahiusa ang mga Pinoy pagbatok sa China?  Mao kana’y giingon nga, “Mas maayo pa kanato ang mga isda, kay bisan walay tataw nga lider, magduot ug magpanon pa kon manglangoy."  Madahaan!

Walay pagpakabana

Alang kang Cebu City Acting Mayor Raymond Alvin Garcia, nagmalampuson ang gipahigayon nga city-wide clean up sa dakbayan sa Sugbo niadtong Hunyo 22 diin mokabat og 87 ka tonelada nga basura ang nakolekta gikan sa mga kasapaan.  Apan alang kang Konsehal Joel Garganera, makapahingawa ang maong gidaghanon sa basura nga natigom kay nagpasabot man kini nga wala gihapon magpakabana ang katawhan sa ilang tulomanon paghipos sa ilang mga basura. Sa gidaghanon sa nakolekta’ng basura, dili na lang unya kita magbagulbol kon ngano nga bisan sa diyotay’ng ulan, magbaha man dayon ang atong kadalanan. Muleeng!

Sungogan ang DOTr

Gitangtang na ang mga kontrobersyal streetlights diha sa Osmena Boulevard human mimando sa Acting Mayor Raymond Alvin Garcia kabahin niini tungod sa kakuyaw ug kapeligro niini ngadto sa pedestrian ug sa mga commuters. Apan itaud ra kuno pagbalik ang maong mga streetlights kon makompleto na ang mga preparatory works. Daghan na nga kahasol ang nahimo sa DOTr ngadto sa mga Sugboanon tungod sa kadaghang sayop sa pag-implementar sa CBRT.  Kon adunay China nga nang-bully sa Pilipinas, ania usab ang DOTr nga nagpunay’g bully sa mga Sugboanon.  Pagkasungogaan!