Panahon na nga mangayo’g tabang       

Daghan ang nagubot sa gipahibawo ni Bise Presidente Sara Duterte nga kumpirmadong mokandidato pagkasenador sunod tuig ang iyang amahan nga si kanhi presidente Rodrigo Duterte, iyang maguwang nga si kongresista Paolo Duterte, ug ang iyang manghod nga si Davao City Mayor Sebastian “Baste” Duterte.

Matud niya nga tulo gyud ka mga Duterte ang magdungan paglansar pagkasenador sa 2025 mid-term elections. Dugang sa bise presidente nga sa 2028 ang iyang manghod nga si Baste maoy mokandidato pagkapresidente tungod kay gusto sa iyang inahan nga mobalik siya isip mayor didto sa Davao.

Ang pamahayag sa bise presidente miani dayon og pagsaway gikan sa publiko ug sa media. Kun tinuod man nga mao ni ang plano sa mga Duterte, tingali unang higayon ni sa kasaysayan sa politika sa Pilipinas nga tulo ka membro sa pamilya ang magdungan pagpapili sa samang pwesto.

Samtang tinuod dunay mga dynastiya sa politika nga naglingkod ron sa Senado apan wala sila magdungan sa paglansar. Nagtagunhos sila sa pagkandidato ug nag-abot ang ilang mga termino didto sa Senado.

Pananglitan ang inahan ug anak nga si Cynthia ug Mark Villar ug ang managsuon nga si Peter ug Pia Cayetano. Dunay laing managsuon nga nagdungan pagkandidato apan dili sila pareho og apelyedo—sila si Senador JV Ejercito ug Jinggoy Estrada.

Kuwang hinuon ko sa pagtuo sa pamahayag sa bise president. Kun magdungan og kandidato pagkasenador ang iyang amahan ug ang duha niya ka mga igsuon, kinsa may mahabilin sa Davao? Lisud tuohan nga itugyan sa mga Duterte sa lain ang syudad. Dako hinuon ang kahigayonan nga usa nila ni Baste ug Paulo ang mag-senador apan nungka nga silang tulo uban sa ilang amahan magdungan pagkasenador.

Kun imong susihon og maayo ang pamahayag ni Sara makuha nimo ang tubag sa imong mga pangutana. Naghisgot siya nga si Baste maoy modagan pagkapresidente sa 2028. Sa laktud paukyab ang pamahayag ni Sara aron paglibog sa ilang mga kritiko ug posibleng kaatbang sa 2028.

Dayag ang motibo sa bise president sa iyang paukyab aron mabahin ang atensiyon sa ilang mga kontra ug dili mapunting niya ang tanang atake labi pa nga misugod na og kanaog ang iyang popularity rating.

Kay mosugot si Sara ug sa dili gikan karon hangtod sa 2028 siguradong siya maoy punterya sa pangatake sa mga nagtinguha paglansar pagkapresidente, usa na niini an ig-agaw ni Presidente Bongbong Marcos nga si House Speaker Martin Romualdez.