Magpa-bully ra gyud ta

Daghan ang nakapangyamiid sa mga nakabasa sa balita nga si kanhi presidente Rodrigo Duterte ug ang duha niya ka anak, molansar pagka senador sa eleksyon karong sunod tuig.

Way makabuot kanila ni Digong, ug sa duha niya ka anak nga sila si Davao 1st District Congressman Paolo Duterte ug Davao City Mayor Sebastian Duterte kon molansar sila sa pagka senador.

Si Vice Presidente Sara Duterte maoy mibutyag niini sa mga sakop sa media atol sa usa ka ambush interview didto sa Cagayan de Oro City.

Miingon pa gani si Inday Sara nga si Mayor Baste nagtinguha usab nga modagan sa pagka presidente sa nasud. Wa gihapo’y makapugong kaniya kon modagan pagka presidente.

Daghan ang nakapangutana nganong managan man sila pagka senador? Klaro kaayo ang katuyoan niini nga kon sila makadaog, daghan sila nga makapanalipod kang Digong.

Nasayod na baya ta nga giimbistigar karon sa International Criminal Court (ICC) ang nahitabong pagpamatay sa daghang gidudahang nalambigit sa shabu atol sa termino ni Duterte pagka presidente.

Gustong sutaon sa ICC ang pamasangil nga gilapas sa administrasyon ni Duterte ang tawhanong katungod sa mga tawo nga gipangpatay.

Ako hinuon, makapamatuod gyud nga daghan niadtong mga napatay sa kapolisan atol sa administrasyon ni Duterte, mga nalambigit sa ilegal nga drugas.

Kadtong operasyon sa kapolisan sa Ozamiz City nga napatay gani ang mga iladong politiko, gihulagway to nga usa sa mga dagkong kalampusan ni Duterte sa kampanya sa drugas.

Apan dili sab hinuon ikalimod nga duna sa’y mga sipyat kay gani, karong bag-o, may mga polis man nga gikonbikto sa hukmanan tungod sa sayop nga pagpatay nila sa target sa ilang operasyon.

Tumong nilang Duterte nga daghan ang ilang mga dumadapig sa Senado nga makalaban aron dili masayon-sayon pagdakop ang mga hingtungdan.

Bahin sa giingong plano ni Mayor Baste pagdagan pagka presidente, moingon ko nga daghan pa siyang bugas nga kaonon usa makadaog sa maong pwesto.

* * *

Luoya tawon sa Pilipinas, bisan giunsa na lang sa pagdaug-daog sa China Coast Guard ang mga sakop sa atong Navy, pabilin kita nga nagkiyugpos.

Klaro kaayo nga nahadlok ang atong mga opisyal nga tingali’g mosukol ta, mahitabo ang gubat ug pila ra man tawo’y atong umoy.

Ikatandi ra kita sa kuto, nga igo ra tudson sa China. Sayonan ka nga kapin ra sa 250,000 ang atong mga sundalo, samtang ang China mga duha ka milyon?

Gihulagway gud nga ang China maoy labing daghan og mga sundalo sa mga nasud sa tibook kalibutan, nga lupig pa nila’g gidaghanon sa mga sundalo sa United States.

Mao nga magpa “upoy-upoy” ra tawon ta, paita.