Utok luyaw, intawon ayaw

Usa ka bililhong legasiya nga gipabarog ni kanhi Presidente Rodrigo Roa (FPRRD) Duterte sa Pampanga, mao ang modernong OFW Hospital nga taudtaod nang napahimuslan sa taga Pampanga.

Gumikan niini, nahimo siyang pinangga sa taga Pampanga. Hinungdan, nadayon gayod ang June 17, 2024 Hakbang ng Maisug Pampanga: Defend the Flag, Freedom Concert and Peaceful Rally sa tumang kamalinawon ug kamatagbawon.  Napalanog gyod ang freedom of speech and of expression sa tanang mamumulong.

Sa pagpakigpulong ni kanhi Spokesperson Atty. Harry Roque, iyang gisangpit si Presidente Bongbong Marcos (PBBM) ug giingnan: “Sumagot ka, Mr. President, adik ka ba?”

Tingale, nakapangutana niini si Atty. Roque sanglit sa PDEA Leaks Senate hearing, nahiapil man ang ngalan ni PBBM sa PDEA Pre-Operations Report list sa mga illegal drug user ug dakponon. Diin, dugay rang nanawagan ang abogado ug ang katawhan nga magpa-drug test kini. Pero, gibale-wala ra sa atong presidente, kinsa naobserbahang wala nay respeto sa atong batakang balaod.

Usab himatikdan, sa sinultihan-aksiyon-desisyon ni PBBM, mora’g kulang na sa kahait iyang panghunahuna. Daw gisalig na lang sa uban iyang obligasiyon isip maoy pangulo ug tigpanalipod sa atong seguridad. Sama sa iyang pagpakigsuod-salig sa Amerika.

Diin, kon kaniadto gidid-an ni FPRRD pagpondar og military bases ang mga Amerikano dinhi sa ato, ning administrasiyong Marcos, ubos sa programang EDCA, nakasiyam na. Nagtuo si PBBM nga ning mga pabor iyang nahatag sa mga Kano, molaban nato ang Amerika kon makiggiyera kita sa Tsina.

Apan dakong tamparos sa iyang nawong kining pipila ka tipik sa pamahayag sa amerikanong former Platoon Commander, U.N. Weapon Inspector and US Marine Intelligence Officer Scott Ritter, kinsa miingon: “You think America is your friend?... We are not friends of Filipinos. We don’t like you. If we did like you, we would not be doing this to you. We are using you. You are a tool. Nothing but a tool.”

Mao kini ang gikahadlokan natong tanang Pinoy. Delikado tinuoray kon kita maka-presidente, simbako og adik. Kay segurado ang utok niini luyaw. Basin, sa giatubang tang dakong suliran sa West Philippine Sea, ang makab-ot niyang hukom kuyaw ug igo na lang kita sa pagsiyagit-tiyabaw: “Intawon, ayaw!”

Unta, dili kini mahitabo.