Mamahimo bang ibaligya ang share bisan kun wa pa ma-transfer sa iyang pangan?

Dear Atty Divina,

Maayong adlaw. Una sa tanan kanunay gyud nga gasunod si pap  sa imong column sa Banat News atty. Ug daghan gayud kami  og nakuhang pagtulon-an labi na sa legal nga proseso. Atty. hinaut ko nga imo usab kini matagaan sa pagtagad. Naay lote nga kabilin sa among apohan Ug naka pangan pa kini kaniya. Sa buhi pa siya, gihatag niya kini sa iyang tulo ka mga anak Ug usa  na akong mama. Unang pangutana atty., unsa man angay nilang buhaton managsuon kun ila nang ipa transfer kada usa nila sa ilang pangalan ang ilang bahin? Ikaduha, kung naay mopalit sa lugar sa bahin sa akong mama, unsay angay buhaton nga wala pa man kini na transfer sa iyang ngalan? Daghan Salamat atty. -- Bebing

Dear Bebing,

Salamat sa inyong pagsunod kanunay sa akong column sa Banat News.  Kalabot sa imong pangutana, kun ila nang i-transfer sa ilang tagsa-tagsa ka pangan ang property kinahanglan nga ila kining ipa-survey og ipa-subdivide og katulo aron patas ang pagka bahin ug klaro sab ang utlanan. Human niini mo-execute silang tulo og Extrajudicial Partition nga pirmahan nilang tulo ug panotaryuhan. Ilang isunod ang pagbayad sa Estate tax ngadto sa BIR pinaagi sa pagpa-compute niini ug pag-comply sa mga requirements. Once aduna na silay Certificate Authorizing Registration then ilang isunod ang pag-transfer sa tax declaration ug sa title sa property ngadto na sa ilang tagsa-tagsa ka pangan. Apan kun pananglit naay mopalit sa share sa imong mama, mamahimo man kini bisan kun wa pa ma-transfer sa iyang pangan ang iyang share. Mo execute gihapon silang mga heirs og Extrajudicial Partition with Sale. Ang share sa  imong mama mao ray ibutang nga maoy gibaligya so inig process sa transfer niini, ang sa imong mama nga share ma-transfer na diretso ngadto sa buyer. Thank you and God Bless! --  Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.