Disaster sa opisina sa disaster

Gikanselar ni Cebu City Acting Mayor Raymond Alvin Garcia ang fuel allocation alang sa tanang sakyanan sa lokal nga kagamhanan sa dakbayan sa Sugbo tungod sa giingong anomaliya nga nahitabo sa buhatan sa City Disaster Risk Reduction and Management Office (CDRRMO). Ang pagkanselar epektibo niadtong adlaw nga Martes, Hunyo 18, 2024.

Apil sa gikanselar ang fuel allocation alang sa mga sakyanan sa barangay. Hinuon wala apila sa acting mayor ang pagkanselar sa fuel allocation sa  mga ambulansiya, police cars, fire truck, garbage truck ug mga emergency nga sakyanan. Ang kanselasyon gipatuman alang sa pagahimoon nga imbestigasyon tungod sa hangyo sa pipila ka mga kawani mismo sa CDRRMO kay matud pa nila nangawat ang ilang labaw sa gisupply nga gasolina ug krudo alang sa mga sakyanan sa gobiyerno.

Si Ronald Hermita, kanhi drayber sa Tanker 3, namasangil ngadto kang Joshua “Wawa” Delumbar ug Jeve Cadungog nga nangawat sa supply nga krudo sa ilang tanker nga sakyanan alang sa ilang personal nga kabolahanan. Iyang giingon nga ang pagpangawat sa duha iya mismo nga nasaksihan. Si Alan Opolentisima miingon nga iyang gipakrudohan ang dakong trak og 100 ka litro niadtong Mayo 14, 2024 apan bisan pa og wala makadagan ang trak, sa dako niyang katingala nahutdan kini og krudo.

 Si Fermin Tabanas laing drayber sa trak namasangil usab kang Delumbar ug Al Januar Nino Yap nga nangawat og 80 ka litrong krudo nga ilang gisulod sa upat ka container. Apil sa gipasnginlan mao sil Harold Alcontin ang pangulo sa CDRRMO apan hugot niya kining gipanghimakak. Iyang giingon nga wala siyay sakyanan.

Si John Justin Rosales kanhi fire engine crew namasangil kang Delumbar nga gikuha niini ang usa ka buwan niyang suweldo. Gawas kang Rosales namasangil usab si Joven Lalimos nga gikuha ni Delumbar ang iyang usa ka buwan nga suweldo ug gikaltasan og tag P1,500 ang binuwan niya nga suweldo gikan niadtong Oktubre 2023 hangtod Enero 2024.

Wala pa mohatag sa ilang habig si Joshua Delumbar ug Jeve Cadungog. Maayo ang gihimong aksiyon ni Acting Mayor Raymond Alvin Garcia pero mas labing maayo nga dili idamay ang uban nga wala maapil sa anomaliya.