Unsaon pagbahin ang kabilin sa una ug ikaduhang pamilya?

Dear Atty. Divine,

Duna koy pangutana kalabot ni sa property sa ginikanan sa akong lolo. Gikaso man gud ning yutaa dugay na kaayo ug karon lang naa nay desisyon sa korte. Ang bahin sa papa ni lolo 600 square meters lang ug tulo ni ang iyang anak, bahinon pa ba og katulo ang maong yuta? Unya kay aduna say anak si Lolo sa iyang ikaduhang asawa unom sab ka buok, maapil ba sab sila sa bahin? Pila man sab ka square meters ang ihatag sa mga anak sa ikaduhang pamilya nga 200 square meters ra man ang bahin sa among lolo atty? Palihog tambagi mi. Thank you and God Bless.

Yen

* * *

Dear Yen,

Tungod kay na-inherit sa imong lolo ang maong property, ang tanan niyang mga anak aduna say katungod nga mangayo sa ilang share ma legitimate man kini or illegitimate. Kun pananglit legitimate ang tanang anak kay gipakaslan sa imong lolo ang ilang mga inahan then dapat bahinon in equal share ang property. Apan kun adunay mga anak nga illegitimate, then ang makuha nilang bahin katunga ra sa bahin sa legitimate. Sa ato pa, kun ang legitimate makabahin og 30 square meters, ang illegitimate nga anak, 15 square meters lang ang iyang share. Aduna say option ang mga heirs nga ibaligya ang property og ang halin nalang ang bahinon aron mas sayon. Mamahimo sab nga ang usa sa mga heirs ra ang mopalit niini ug iyang bayran sa ilang share ang ubang mga igsuon. Thank you and God Bless.

Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.