EDITORYAL - Di mokomento batok sa Chinese

Daghan na kaayong mga dili maayong mga balita mahitungod sa mga dili makiangayon ug nahimo pang hulga sa nasudnong seguridad nga mga gipanghimo sa China dinhi sa Pilipinas may kalabotan sa isyu sa West Philippine Sea.

Ania ang pipila lamang sa mga nabutyag na sa publiko ug giimbestigar na sa mga otoridad tungod sa mga nakitang iregularidad ug gikabalak-ang hulga sa nasudnong seguridad sa nasud nga ang mga nalambigit mga Chinese nationals.

Grabe kadaghan sa mga Chinese nga lalaking estudyante sa usa ka probinsya sa Northern Luzon, naa pay balitang ang mga napangasawa og gobernador ug bise gobernador didto mga pure-Chinese nationals.

Duna say mga ilegal nga drugas partikular ang shabu nga kinilo hangtud tonelada na nakasulod dinhi sa Pilipinas nga giingong tanan gikan sa maong nasud.

Kining operasyon sa mga ilegal nga Philippine Overseas Gaming Operation (POGO) nga dihang gironda adunay mga nakuhang uniporme sa Peoples Liberation Army,   mga Chinese nationals nga nakabaton og birth certificates sa Pilipinas, nakapalit ug nakaangkon og mga tituladong mga yuta ilabi na sa mga baybayon. Mga Chinese nationals nga gironda ug nasakpang adunay mga gamit pangespiya, tag-as nga kalibre sa armas, uniporme sa military ug uban pa.

Nakabaton og Philippine Passports, mga Chinese nationals nga nakapalit og lagpad nga mga yuta ug nagtukod og mga buildings duol sa mga kampo sa Armed Forces of the Philippines apil na sa mga dapit duol sa mga base sa Enhanced Defense Cooperation Agreement (EDCA) Sites ug uban pa.

Pun-an pa ang pagsaka sa mga krimen nga kining mga Chinese nationals nga namuyo dinhi gibiktima ra sab sa mga sindikatong Chinese.

Ug ang padayon nilang pagpangespiya, pagbuhat og kasamok pinaagi sa mga propaganda, pagpanuhol sa media ug doble-karang taras apan ang tumong mao ang pagpanglupig sa mga Pilipino.

Halos kada adlaw mao na kini ang sulod sa mga balita karon dinhi sa Pilipinas tungod sa peligrong dala niini sa tibuok nasud.

Apan nganong dunay mga politiko nga murag naglikay paghatag og komento o pamahayag batok sa China bisan agi og pagpakita og pagmahal sa nasud ug mas mokomento pa man hinuon pagdepensa  sa wanted nga si Pastor Quiboloy?