Google NotebookLM ni Guo
Labihan ka-interesado sa publiko parte ni Bamban, Tarlac Mayor Alice Guo nga bisan wa pa itakda ang sunod nga hugna sa imbestigasyon sa Senado dunay nag-apura nako pagsusi unsay nahitabo niya. Wa ganahi dihang gipahibawo nga, human gisuspenso sa Ombudsman ug gihulga og mga kasong kriminal, wa pay bag-o.
Wa sab malingaw dihang gipasabot nga di mahimong magmugna og magbalikbalik og mga istorya. Pero salamat sa bag-ong katakos sa artifical intelligence nga nasuwayan sa peryodistang si Max Limpag nakakita ko og lusot sa pagbalik og hisgot ni, nakatag-an ka, Guo.
* * *
Akong gi-upload sa GoogleNotebookLM ang tanan nakong lindog ni Guo ug gipangutana unsay labing yanong hapnig sa tanang kasayuran parte sa mayora.
Mga negosyo ni Guo:
" Nanag-iya siya og babuyan;
" Nakumbinser niyang langyaw'ng mga suki sa baboy pagtukod og P6.1 bilyones nga development sa iyang yuta luyo sa munisipyo sa Bamban (maong iyang gipa-rehistro ang Baofu Land Development Inc.);
" Nanag-iya siya og 11 ka kompaniya uban sa iyang mga igsuon (nga wa dayon niya angkona sa Senado).
* * *
Mga atraso ni Guo:
" Paghatag niya og permiso ug pagtugot sa padayong operasyon sa ilegal nga POGO hub sa iyang yuta bisan gironda sa Pebrero 2023 (Hongsheng Gaming Technology Inc.) ug Marso 2024 (Zun Yuan Technology Inc.);
" Pagpa-gorya-gorya niya nga way kasayuran sa human trafficking, scamming, hacking ug ubang krimen nga gidudahang gihimo sud sa POGO hub; ug
" Posibleng mas dako niyang papel sa money laundering ug ubang mga krimen sa sindikato gikan sa mainland China.
* * *
Citizenship ni Guo:
" Niangkon nga ang Pilipina niyang inahan pinaangkan sa iyang amahan ug nibiya human nanganak niya (sukwahi sa duhaka hugpong sa mga dokumento sa Senado nga (1) nakasal ang iyang inahan ug amahan ug duna siyay duha ka igsuon sa samang inahan ug amahan ug (2) posibleng Chinese national ang tinuod niyang inahan ug nilayas sa Pilipinas sa pagsugod og imbestigar sa Senado sa niaging buwan sa tinuod niya nga kagikan); ug
" Padayong gitun-an sa Office of the Solicitor General unsa katinuod ang iyang birth certificate ug ubang mga dokumento pangandam sa posibleng pagpasaka og petisyon sa quo warranto nga laktod nga motangtang niya pagka mayor.
* * *
- Latest
