Gilawog lang sa tirong

Kusganong namahayag ang Armadong Kusog sa Pilipinas (AFP) sa pag-ingon nga, Dili kita mapugngan ni mahadlok luyo sa laraw sa China pagpatuman na sa ilang no trespassing policy sa West Philippine Sea.  Giawhag usab sa AFP ang mga mananagat sa pagpadayon sa ilang pagpanagat diha sa WPS kay andam ug tagana ang atong armadong kusog sa pagpanalipod kanila.  Dako pang tanghaga kon unsaon pagpanalipod sa atong armadong kusog sa mga mananagat nga madakpan unya sa China.  Basin sa kapulihay, makatuaw na lang unya ang atong mananagat sa pag-ingon, Inyo ra man kaming gilawog sa Tirong.  Fezteleern!

Level up na senador!

Mopahigayon og imbestigasyon ang Senate Committee on Public Services, nga gipangulohan ni Senador Raffy Tulfo, kabahin sa bag-ohayng panghitabo sa NAIA Terminal 3 diin unsa ka babayeng Vietnamese ang naglakaw-lakaw nga hubo sa may departure area. Morag overkill ang laraw ni Senador Tulfo. Gamay ra ang maong panghitabo ug dili maka-apektar sa atong nasudnong polisiya ug tingusbawan, busa dili na kini angay usikan og panahon ingon man resources sa Senado. Bisan senador na, morag gipakasama gihapon ni Tulfo nga nagdumala gihapon siya sa programa nga Isumbong mo kay Tulfo. Mo-Level up na pud unta ka Nyor.  Atotch!

Sekreto sa maayong sermon

Miluwat og bag-ong polisiya si Pope Francis nga kinahanglang ang mga pamalandong o homily dili molapas sa otso minutos kay hayan mawad-an og interest ug mahikatulog na hinuon ang manimbahay.  Daw haum kining polisiya sa panahom nga naga-ingon, Ang sekreto sa usa ka maayong sermon mao nga aduna kini maanindot nga sinugdanan ug maanindot nga katapusan, ug nga kinahanglan nga duol ra sila sa usag-usa. Kay lage ginaingon man nga Walay makasasala nga naluwas human siya mamati sa naunang 20 minutos nga sermon. Kay gani si Judas Escariote, nagmabudhion man bisan nabati niya ang tanang sermon ni Ginoong Hesukristo. Muleeng!

Politiko ug diaper

Nadiskobrehan sa mga awtoridad didto sa Kawit, Cavite, ang mokabat 100 ka milyon ka pesos nga kantidad sa mga frozen goods sulod sa usa cold storage facility nga gitago luyo sa mga peke nga bongbong.  Nabutyag ang maong cold storage facilities tungod kay nanimaho na ang ubang mga produkto nga gisulod niini.  Morag nanimahong karma sa hoarding man kining kahimtanga.  Wala gyud diay baho nga dili moalisngaw.  Makapahinumdum sa panultihon nga Ang diaper ug ang politiko angayng ilisan kanunay sa managsama nga rason: Manimaho sila sa kadugayan.  Pagkatoytoy!

Tubig ug lana

Dili dawaton ni Cebu City Councilor Jun Alcover ang gisangon kaniya nga executive function isip Chairman sa Committee on Agriculture sa konseho kon dili modemitir o ba kaha ilisan ang kasamtangang City Agriculturist nga si Joey Baclayon. Daw dulot na sa bukog ang kayugot ni Konsehal Alcover ngadto kang Baclayon.  Kon unsa man ang tinuod nga hinungdan ning ilang panagbangi, sila lamang ang nasayod. Aduna ra bay panultihon nga nagaingon, Ang panaghigala ug ang kwarta nahisama sa lana ug tubig, dili gayod magkasagol.  Madahaan!