Nagdakop og kuneho

Giawhag ni COMELEC Chaiman George Garcia ang Kongreso sa pagpasar og balaodnon nga magtugot sa maong ahensiya sa pag-regulate sa mga social media posts sa usa ka kandidato sa panahon sa pagpangampanya sa tuyo nga malikayan ang mga fake news, misinformation ug disinformation. Dili man tingale dako’ng concern sa COMELEC ang mga isyu nga i-post sa social media kabahin sa kandidato.  Mas maayo pa nga ipunting na lang sa COMELEC ang ilang paningkamot nga mapahigayon ang hapsay, tinuoray ug limpyo nga eleksyon.  Haum ang panultihon nga “Kon dunganon mo pag-gukod ang duha ka kuneho, wala ka gyuy madakpan bisan usa”.  Muleeng!

Pasayloa ko’s imong sala!

Gikahibulong ni Senador Nancy Binay ang pagpangayo’g pasaylo sa uban’g mga senador ngadto kang Senador Zubiri human nila kini palagpota isip Senate President.  Alang kang Binay, kon ugaling adunay nahimong kasaypanan si Zubiri, ngano’ng nangayo man sila og dispensa, apan kon wala, ngano’ng ila man’g gipalagpot? Dugang pa ni Binay, nagtuo siya nga tinuod nila’ng higala ang uban’g senador apan dili man diay.  Kini’ng kahimtang karon sa senado, mihulagway sa panahom nga, “Sa politika, walay permanente nga higala, aduna lama’y permanente nga interest o katuyoan”.  Fezteleern!

El Nino ug itlog

Tungod sa epekto sa El Nino, nakasinati og pagkunhod sa produksyon sa itlog ang mga poultry farms sa Bantayan Island hinungdan sa pagka-alkansi sa mga magpapatigayon sa maong isla.  Angayan tingale nga mahatagan og subsidiya ang mga tag-iya sa poultry farms sa Bantayan Island.  Kay matud pa sa akong higala, “Naglisod na sila sa pagbangon sa ilang Negosyo, unya naa pa gyuy mobugal-bugal nila’g pangutana kon “unsay nag-una, ang itlog o ang manok?”  Madahaan!

Naahat og kanta

Mipalabang ang konseho sa Cordova, Cebu og ordinansa nga nagdili sa pagkanta sa makusog nga tingog pinaagi sa videoke ug uban’g susamang devices sulod sa alas 10 sa gabii hangtud sa alas 9 sa buntag. Kabahin sa kulturang Pilipino ang pag-videoke, apan kinahanglan nga dili usab kini makahasol sa uban.  Makapahinumdum sa tawo nga wala na maka-agwanta sa kasaba sa iyang silingan nga nag-videoke tungod kay nagsaulog og birthday, busa iyang gisulong arong badlongon.  Sa dihang gipangutana siya kon unsay nahitabo sa iyang pagbadlong sa silingan, mitubag siya nga, “Hastang kagumkoma sa panit sa inasal nya humok sad kaayo ang humba pagkaluto. Nindot pa jud kaayo ang microphone sa ilang videoke. Naahat ko’g kanta ka-duha uy”.  Pagkatoytoy!

Trial and error

Giaprobahan na ni Presidente Marcos ang lakang nga pagbalik sa naandan nga school calendar ug gitakda na ang pag-abli sa klase alang sa School Year 2024-2025 karong Hulyo 29, 2024 ug motapos kini sa Abril 15, 2025.  Gihangop sa kadaghanan kining maong desisyon sa presidente.  Salamat na lang kay sa kadugayan, nahigmata na ang taga-DepEd sa ilang paghikatulog.  Makasinati na gyud ang atong kabataan og tinuod nga summer vacation.  Hinaut nga dili na mohimo ang DepEd og mga trial and error nga pamaagi sa pagtudlo diin nagdaghan lang error kay sa trial.  Saoonz!