Intensyon batok atensyon

Alang kang Senador Risa Hontiveros, makapikal ang laraw sa China pagpadala og dako’ng pwersa aron mababagan ang civilian mission sa Panatag Shoal.  Dugang pa sa senador, kon maka-asta ang China, daw gipanag-iya na nila ang maong kadagatan nga sakop sa atong EEZ.  Makita ni’ng kahimtanga ang kalainan sa pulong ug sa buhat.  Gipakita sa China ang ilang pagpangangkon sa maong lugar pinaagi sa buhat. Samtang ang Pilipinas, gipaagi lang ang pagpangangkon sa iyang mga pagarpar. Tataw nga ang buhat sa mga opisyal sa China alang sa usa ka tumong o intensyon; ug ang buhat usab sa mga opisyal sa Pilipinas, aron lang makakuha og atensyon.  Fezteleern!

‘Umpisahan mo, tatapusin ko’

Matud pa sa tigpamaba sa Philippine Navy diha sa West Philippine Sea (WPS) nga si Commodore Roy Vincent Trinidad, mopakatap ang Philippine Coast Guard (PCG) og mga barko sa palibot sa Escoda (Sabina) Shoal diha sa WPS aron mapakgang ang China sa ilang mga reclamation activities sa maong lugar.  Bisan sa buhaton sa PCG, walay kaseguroan nga dili na usab maghimo og laing reclamation ang China sa ubang lugar sa atong EEZ.  Sugyot sa akong amigo, “Matag higayon nga adunay sugdan ang China, ato sila’ng abogon, unya atong tiwason ang reclamation. Syaro’g dili pul-an”.  Matud pa sa ulohan sa salida, “Umpisahan mo, Tatapusin ko”.  Aleleert!

Gikagiwan sa tanlag

Gidasig ni Catholic Bishops’ Conference (CBCP) President Pablo Virgilio David ang mga dioceses sa pagtamod sa “International Day of Conscience” nga gitakda karon’g Hunyo 16, 2024.    Kon basehan ang naghingapin nga kalisod ug kakabos sa katawhan angayan saulogon ug tamdon kanunay ang maong adlaw sa panudya kay daghan na kanato ang daw gikagiwan na sa atong tagsa-tagsa ka tanlag.  Sagad man gud kanato, nagtoo nga “ang pagkalimtanon, timailhan kunohay sa usa ka limpyo nga tanlag”.  Madahaan!

Lipay nga gipasanginlan

Gidayeg ni Presidente Marcos ang Land Transportation Office (LTO) sa paningkamot niini nga makab-ot ang “zero backlog” sa pagpang-issue og mga license plates.  Ambot kon angayan ba ang LTO sa maong pagdayeg ug kon matinud-anon ba sila sa ilang kaugalingon kay kon atong mahinumduman, sulod sa dugay nga panahon, wala mahatagi’g kasulbaran ang maong suliran.  Mas maayo pa ang akong higala nga sa dihang akong gipangutana kon uyab ba niya ang maanyag nga babaye nga iyang katapad sa eroplano, mitubag siya sa tumang kamatinud-anon nga, “Dili mi uyab Bay, pero nalipay na lang ko nga imo ko’ng gipasanginlan”.  Pagkatoytoy!

Magpakahilom lang

Misaad si Acting Cebu City Mayor Raymond Alvin Garcia nga mogamit og diplomasya sa pag-atubang sa mga kontrobersiya nga naghamok sa kagamhanan sa dakbayan.  Nagtoo si Garcia nga walay mahimo kon batunan ang ka-agresibo ug pagka-masuk-anon.  Maingon nato nga nahasubay kining polisiya sa Acting Mayor sa panultihon nga “Ayaw insultoha ang buaya, samtang wala ka pa makalabang sa sapa”.  Apan ni’ng maong polisiya, dili usab piho nga makab-ot ang mga tumong sa pangagamhanan kay ginaingon man usab nga “Ang usa ka diplomatiko mopensar una sa makaduha una pa siya mohukom nga magpakahilom.”  Saoonz!