Higanteng kakak sa China
Kon kumbinsido ang China sa ilang pagpanag-iya sa Ayungin Shoal, nganong wa man nila biraha palayo ang tayaon na kaayong BRP Sierra Madre uban sa kapin sa dosena ka sakop sa Philippine Marines ug Philippine Navy?
Gi-bombardiyohan na og water cannons ug gibanggaan na nila ang commercial vessels nga gikargahan sa binuwan nga rasyon sa pagkaon, tubig ug tambal ug ang nikuyog nga mga barko sa Philippine Coast Guard (PCG), pero wa man nila hilabti ang barko nga gituyo sa pagsangad niadtong 1999, o 25 ka tuig na ang nilabay?
* * *
Wa pasayloa sa China ang BRP Sierra Madre sa abunda nilang mga hudlat. Ang mga sundawo nga nagbanus-banos sa pagduma sa barko kada tulo ka buwan napiskan sa pipila sa gatosan ka radio challenge sa China Coast Guard (CCG), nga naglakip sa pag-insistir nga ang Ayungin nga ilang ginganlan og Ren'ai Jiao kabahin sa nasudnong teritoryo sa China.
Pero wa mangahas ang China paghasi sa mga sundawo. Bisan sa mga higayon nga gituyo nila pagkusog og kanta sa Lupang Hinirang ug gipakayap nila og mas taas ang nasudnong bandila.
* * *
Ang laktod nga katin-awan mao ang katalawan sa China. Bisan sa pagpanghambog sa dagko nilang mga barko, mahadlok sila sa paggamit og puwersa batok sa Pilipinhong mga sundawo.
Kay ang BRP Sierra Madre aktibong barko sa Philippine Navy. Kon tandugon sa China, bisan pasiritan og water cannons o tionan og military grade laser, makasud na ang ilang gikahadlokan nga mas modernong mga barko ug ayroplano sa gubat sa Estados Unidos pinasikad sa Philippine-US Mutual Defense Treay.
* * *
Labing lig-on nga ebidensiya sa kabakakon sa China mao ang 80 anyos nga BRP Sierra Madre. Nga bisan nalukop na sa mga buslot nagpabiling nagbarug isip gamhanang simbolo sa pagpanag-iya sa Pilipinas sa Ayungin ug tibuok West Philippine Sea.
Di nang kalaom ang China nga mapatuman ang pasalig ni kanhi Presidente Rodrigo Duterte nga pasagdan nga mahurot og kaon sa taya ug mahagba ang barko. Ang pakauwaw ni Duterte wa makabakwi sa desisyon ni kanhi Presidente Joseph Estrada, usa sa nihit kaayong tsamba sa kurakot niyang pamunoan, sa tuyo nga pagsangad sa barko sa ikaduhang tuig sa naputol niyang termino.
* * *
- Latest
