Libre ang mangandoy

Kini ang gihimong hanig sa usa ka grade 11 student gikan sa lalawigan sa Siquijor nga nangandoy nga makadughit og medalya sa nagpadayon nga Central Visayas Regional Athletics Association kon CVRAA meet mga gibuksan kagahapong adlawa sa South Road Property SRP lot.

Sa paghiabot pa lang sa mga delegado gikan sa upat ka mga lalawigan sakop sa rehiyon managlahing pangandoy ang bawon sa mga atleta ug usa na niini ang dalagita nga Angela Duhaylungsod sa baranggay Ponong.

Matud niya nga dili tiaw tiaw ang iyang pagpangandam sa sangkat sa kinakusgan nga modagan diin siya ang representate sa 3,000 meter dash tungod kay atol pa lang sa iyang practice gilatas niya ang upat ka mga bukirang baranggay sa ilang lungsod sa Siquijor aron maseguro nga maanad ang iyang lawas ug makasugakod sa aktwal nga sangka.

Siya ang kamaguwangan sa walo ka managsoon ug mga mag uuma ang ilang mga ginikanan diin igo igo lang ang kita niini nga makakaon ang ilang pamilya busa naningkamot siya nga makadaug sa mga local sports competition diin una siyang nakalangkat og medalya atol sa ilang provincial meet ug karon mao na ang iyang targert ang medalya sa CVRAA kay mao kuno kini ang yawe pud niya nga makasalmot sa Palarong Pambansa.

Makapadayeg ang determinasyon sa dalagita kay kung mangandoy kuno siya kadto nalang kunong kinatas-an diin ultimate goal niya ang olympics sa umaabot nga dili layo nga matuman tungod sa lig-on  niyang determinasyon sa kinabuhi ug kompyansa sa iyang kaugalingon.

Yano ra kaayo ang pamilya sa dalagita gani wala kiniy cellphone ug gamay ra nga kantidad ang iyang pocket money kay lagi lisod pud ang ilang pamilya apan dayag sa iyang panagway nga kontento ra siya kon unsa ang anaa niya karon. Maayo nalang kay lig-on ang suporta  nga gihatag kanila sa ilang tunghaan ug sa lokal nga kagamhanan.

Ang kalig-on sa determinasyon ni Angela ang maghatag og kadasig usag sa ubang mga batan-on nga magpursegi sa ilang tinguha aron makab-ot ang ilang damgo, kay tinood gyuyd nga mahatagan og katumanan ang pangandoy kung maningkamot lang ug labaw sa tanan lig-on ang self-confidence.

Kay libre man ang mangandoy, todohon nalang kadtong labing dako kay libre man apan seguradohon gyud nga masuportahan ang kainit sa tinguha dili lang sa dalagitang atleta kon dili sa mga batan-on nga sama kaniya nga puno sa paglaum nga ugma damlag makab-ot nila ang ilang gitinguha.