Kulang sa paukyab

Gibutyag ni Presidente Marcos ang usa ka alternatibo’ng laraw aron mapakubsan ang presyo sa bugas taliwala sa panawagan pag-amendar sa Rice Tariffication Law (RTL) pinaagi sa pagpabuhagay sa kagamhanan og baratong bugas sa merkado aron mapugos pagkunhod ang presyo.  Mora’g yano nga balaod sa “supply and demand” ra man ang maong solusyon apan sa kadugay nga nahuna-hunaan ug nadiskobrehan, daw naglambigit og prinsipyo sa quantum physics ug integral calculus.  Daw kulang sa drama ug paukyab ang pagbutyag sa maong laraw kay wala man mosiyagit ang presidente og “Eureka”.  Fezteleern!

Hunahuna ra

Namahayag si Presidential Adviser for Poverty Alleviation nga si Secretary Larry Gadon nga ang kawad-on ug kakabos sa Pilipinas anaa sa hunahuna lamang.  Gipasikad ni Gadon ang iyang pamahayag sa kadaghan kuno sa tawo sa mga shopping malls ug sa mga fast food chains.  Daw hinanggaw man kining pamahayag ni Gadon ug walay tataw nga basehan.  Makapahinumdum sa pasahero sa express bus nga mihangyo sa konduktor nga manaug una kay nag-alburoto ang iyang tiyan apan giingnan lang siya sa konduktor nga "hunahuna ra na nimo Nang”.  Kay wa man kaagwanta, mipabuhagay ang pasahero hinungdan nga nanimaho ang sulod sa bus. Sa dihang gipangutana siya sa konduktor kon siya ba ang hinungdan sa baho, mitubag usab ang pasahero nga “Hunahuna ra na nimo, Dong”.  Pagkatoytoy!              

Bag-Ong Katuyoan

Gideklarar ni Cebu Governor Gwendolyn Garcia ang lalawigan sa Sugbo ubos sa state of calamity tungod sa epekto sa El Nino phenomenon nga nasinati sa tibuok isla sa Sugbo.  Apan walay laraw nga manghatag og ayuda ang kagamhanan kay dili buot ang gobernadora nga makaumol og kultura sa pagkatapolan ug pagkamakililimos ang mga mag-uuma. Kon dili manghatag og ayuda, unsa ma’y pulos sa maong deklarasyon?  Matud pa sa akong amigo, “Sa ato pa diay, ang bag-ong katuyoan sa pagdeklarar sa “State of Calamity” mao ang paghimo sa mga mag-uuma nga kugihan ug dili na kayoan”.  Madahaan!

Bag-ong Kahulogan

Padayon nga mitala ang MCWD og pagkunhod sa produksyon sa tubig nga miabot na sa 68,290 metro kubiko timailhan sa nagkagamay nga suplay sa tubig.  Apan malaumon gihapon ang MCWD nga mopaigo ra ang suplay sa tubig hangtud nga moabot na ang ting-ulan.  Ni’ng pamahayag sa MCWD, daw gitugyan na lang nila sa kinaiyahan ang kasulbaran sa kakulangon sa tubig.  Mora'g haum ang komedya sa kadaghanan bahin sa bag-ong kahulogan sa MCWD: “Moagas Cadiyot, Wagtang Dayon”.  Saoonz!

Palanggana ug Baso

Gisaway ni Speaker Martin Romualdez ang giluwatan nga regulasyon sa China sa pagdetenir sa mga langyaw nga mo-agi diha sa West Philippine Sea dugang sa pag-ingon nga makasamot kini sa tensyon diha sa maong gilalisan nga lugar gawas nga nakalapas usab kini sa international laws. 

Lain na usab kini nga mapangahason nga lihok sa China sa pagpangangkon nila sa West Philippine Sea.  Dili kini angay ibale-wala sa atong kadagkoan bisan pa man sa pagtoo sa uban nga hudlat lang kini.  Angay usab kita’ng mangandam kay matud pa bitaw sa Intsik, “Kon wa ka palanggana (panagana), baso (magbasol) ka”.  Muleeng!