Dili matag-an ang kapalaran

Makapungot ang gipakitang ka abusado sa gahom nga nahuptan sa administrasiyong Marcos karon. Imbes moy mahimong modelo nga relihiyosong motuman sa atong Batakang Balaod, mao hinuoy migawas nga numero unong supakero.

Bati kaayong hunahunaon, nga ang House of Senate, House of Congress, Department of Justice ug uban pang institusiyon/ahensiya, himatikdan sa mga nagpakabanang sosiyedad, nga ingon sa nahadlok silang mosupak sa unsa man ang isugo nila ni Presidente Bongbong Marcos (PBBM), First Lady Liza Araneta Marcos ug House Speaker Martin Romualdez, bisan ang maong mga sugo, sila rang mga selected few: oligarchs and cronies ang mabulahan-mabuhong. Samtang ang kinabag-ang hut-ong sa katilingban gikan sa middle class down to the poorest maoy naalaot pagsamot.

Tagpila na ba ang kilo sa bugas, isda, baboy, manok ug uban pa?  Ikomparar sa mga ultimong nagsuweldo ra gihapon og tag P300 kapin? Dili ba, luoy kaayo?

Apan nakurat ko sa miaging Abril 29 sa gabii, dihang nagdalag duruha ka bisita si misis sa among balay. Kaabag kanhi sa among panimalay ang 40 anyos nang babaye nga kaniadto tin-edyer pang diri namo, kinsa migawas aron manimpalad sa Brunei. Samtang ang guwapong iyang kuyog, 17 anyos, iyaha diayng anak. Ug nahaulpot ko pag-ingon niya, nga mag-piloto kuno kini.

Tiaw bay, milyonmilyong pesos ang magasto sa moeskuylag piloto. Unya, gipahiyoman ra mi niya ug mitug-ang nga napangandanaman na nila kini. Didto namo masayri, nga seaman diay ang nabana sa kanhi namo kaabag ug may mga ektarya pang yuta didto sa Ilocos. Usab, adunay brand new black Fortuner, diin siyay modrayeb kun wala iyang mister.

Apan bisag dato na, nagpabilin iyang pagkamapaubsanon. Pinobreng sinina ug karsones gihapoy gisul-ob. Hinuon bisag gitun-an niyag daro iyang anak, molutaw gyod sa hitsura nga may kaya kini. Unya, dihang nanamilit kay mangadto na silag airport, nangutana ko kun silang taga Ilocos saludo ba sa administrasiyong Marcos?

‘Big No!’ iyang gitubag.  Unsaon, gawas nga pro-good-governance lover siya, usa pa gyod ka well-disciplined mother. Ug nakita namo kini sa kinaiya sa iyang anak, kinsa sobra ka matinahuron.

Gibati ko ang tumang kalipay samtang nagsud-ong sa nagkalayong Innova nga ilang gisakyan, dungan ang pagtuaw: “Dili gyod matag-an ang kapalaran.”