Ang dakong sugo

Maayong balita

Pabilin kamo sa Akong Gugma! kini ang gibuhiang mga pulong sa atong Ginoo ngadto sa iyang mga tinun-an. Usa kini ka mando nga dili angayang ibalewala. Mando kini nga angayang tumanon uban ang pagkamatinud-anon.

Mando kini nga gamhanan kaniadto, karon ug sa umaabot! Dugang pa, gawas nga kini usa ka mando gikan sa Ginoo gyud mismo ang tuburan sa gugma ug kinabuhi, atong pagaisipon nga ang maong damgo usa usab ka tawag dili lamang sa pipila kondili sa kadaghanan man kanato.

Kasinatian

Sa atong adlaw adlaw nga pagkinabuhi daghang mga butang ang atong nadungog kalabot sa gugma kun sa unsa kini paagiha gipakita ug gipadayag. Apan daghang mga hitabo usab kun sa unsa kining paagiha gidagmalan.

Ang mando nga Paghigugmaay kamo gihimo naman hinuong paglinabwanay! Daghan sa mga tawo ang niisip sa kinabuhi ingon nga usa ka kompetisyon. Giisip ang matag usa ingon nga hulga sa kalampusan ug tinusbawan sa usa.

Ning paagiha wala gyud ang tawo mosalamin ingon nga tinun-an sa Ginoo nga mahigugmaon. Gugma ang Dios!  Apan ang mga tawo dili buot mosubay sa maong mando kay lagi mas maayo nga magpakabuhi segun sa ilang gusto ug kabubut-on ug dili pinaagi sa kabubut-on sa Dios.

Lihok

Panaad nga sugod karong Adlawa ikaw magmahigugmaon nga higala ngadto sa uban!

Pangamuyo

Ikapadayag unta namo ang among kinabuhi Ginoo ingon nga gugma alang sa uban. Ikaw nga buhi ug hari hangtud sa kahangturan. Amen!