Di madala’g pasikat

Gipahibawo ni Cebu City Mayor Michael Rama nga siya ug si Vice Mayor Raymond Garcia na maoy  mangunay pagdumala sa pagpahapsay sa trapiko dinhi sa dakbayan human miluwat isip chairman sa Traffic Management Committee si Konsehal Rey Gealon.

Matud ni Rama siya maoy modumala sa trapiko sa north district samtang si Garcia maoy iyang tugyanan sa south district uban ni Konsehal Joy Pesquera. Sa kasamtangang sitwasyon sa trapiko sa syudad gikinahanglan ang tinuod nga eksperto sa traffic management.

Gikinahanglan ang usa ka tawo nga motutok sa problema, pagsusi unsay hinungdan ug pagtuon ug pagpangita og mga pamaagi unsaon sulbad. Dili masulbad ang hauot sa trapiko sa gyudad bisan pa og tibuok adlaw magbarog sa tunga sa karsada ang mayor ug bise mayor kun way klarong plano ug pamaagi unsaon nga mahawan ang mga huot nga karsada.

Atong sugdan pagtan-aw ang hinungdan nganong nakasinati ang syudad niining maong problema. Una, nag-anam ka daghan ang mga sakyanan apan nagpabilin ang gilapdon sa atong mga karsada. Ikaduha, kuwang sa disiplina ang mga driver labi pa ang mga pampublikong sakyanan. Ikatulo, pakyas hangtod ron ang syudad paghawan sa mga sidewalk hinungdan nga ang ubang pedestrian adto na moagi sa karsada nga makabalda sa dagan sa mga sakyanan. Ika-upat, illegal parking. Ika-lima, construction sa BRT, ug daghan pa lakip na ang kakuwang og pamaagi ug kahimanan sa dakbayan pagrespondi sa mga aksidente sa kadalanan nga makamugna og pagkabara sa trapiko.

Pananglitan, ang nahitabo niadtong Biyernes diha sa Cebu South Coastal Road nga pagkabara sa trapiko og sobra sa 10 ka oras tungod sa usa ka trailer truck nga nadasmag sa road barrier sa north-bound lane. Daghan sa mga motorista natanggong tibuok adlaw diha sa South Road Properties tungod kay nabara ang dagan sa trapiko.

Nalikayan unta ang dugay nga pagkabalda sa trapiko kun nakuha pa dayon ang naguba nga trailer truck. Wala kunoy kahimanan ang syudad nga makahimo pagguyod dayon sa trailer aron mahayan ang karsada ug maagian dayon pagbalik.

Sa padayong pag-uswag sa atong ekonomiya dili gyud malikayan ang traffic apan kinahanglang mosunod sab sa kalamboan ang atong mga opisyal. Dili madala og pasikat ug wara-wara tunga sa karsada ang suliran sa trapiko.